Shillong: Nailar 15, 2020: Ka Khusnam Crystal Gayle naka bynta ka jingtbit tam ha ka Thohdur (Visual Arts) ha u snem 2020 la ainam ha u samla Mario Pathaw da u Lat ka jylla, u Tathagata Roy ha la paki dulan Raj Bhavan. Ha kane ka sngi u Lat u la plie paidbah ruh ia ka dur jong u Sardar Vallabhai Patel, katba ka mahadei u Lat, ka Anuradha Roy ka la plie paidbah ki dur ba la thoh da ki barikor ka synjuk Riti Academy, u samla Skhemlang Hynñiewta bad Denis Marbañiang.
U Lat u la pyrto bad ïaroh ïa ki kam radbah jong ka Riti Academy of Visual Arts hapoh ka jingialam jong u Bah Raphael Warjri, ha ka ba ki dur baroh ha kamra bah jong ka paki dulan kynthup ïa ki dur jong u Syiem Tirot Sing, Kiang Nangbah bad Pa Togan Sangma. Ka khusnam sah kynmaw ia ka Crystal Gayle Kharnaïor ka dei ka ba la ju ainam man la ka snem naduh 2018.
La pynïaid ïa ka jingrakhe ainam Khusnam ïa u samla Mario da u khliehduh ka synjuk Riti Academy, u Bah Raphael Warjri; u ba la pynpaw ka jingsngewnguh ka ba khraw ïa ka shlem treikam jong u Lat; wat hapdeng jong ka saw ka sian na ka khlam COVID 19.
U samla Pascal Mario Kmenlang Pathaw u dei u khun Khasi u ba la lum jingtip shaphang la ka tynrai riti dustur ha ryngkat ka jingsngewthuh bashai ïa ki khuiñ ka juk mynta. Lasngewthuh ruh ba ka thymmei longiing longsem ka dei ka ba la pyrsad mynsiem, bsa jingstad bad jingshemphang ha la ka tynrai, ha ka ba ka la ai mynsiem bad pynshlur ban kyntiew nam ha la ka kam thohdur.
Ki kam ba kynsai jong u samla Mario ki long ki ba shynna ïa ki kam ba la aiti bad duriap ban khajoh sha ki mawmer jong ka nam. U samla Mario u dei u ba pule pyntbit na IIT Bombay ha ka kyrdan Master of Design bad Bachelor’s Degree in Architecture, nalor ba u dei u ba shitrhem bad tbit ha la ka kam thohdur ban kyntiew ïa ka miatdur. U dei u khun phrangsngi jong I Kong Rosa Pathaw bad Dr Pascal Malyngiang (Bam kwai ha dwar U Blei).
Kum ban pyrto ïa ki kam bakhraw jong ka riti dustur Khasi kum ba ka paw lyngba ki dur, la jied kyrpang ïa u samla Mario Pathaw ban ainam da ka Khusnam Mattithaw Crystal Gayle 2020, na ka bynta ka ba u la tyngshaiñ ha ka kam thohdur ba bun jait.
Hadien ba la dep ai khusnam la bteng sa ka pyninam ïa ki kam thohdur jong u samla Mario ha MAD Gallery, Jaiaw Langsning. U kher rangbah ka tnat treikam sorkar, u Bah F R Kharkongor, IAS, Commissioner Secretary Arts & Culture u ba la kren khia thew halor ka jingkordor jong ki dur dro ki dur thoh, kat haduh ba u la kyntu ban shna noh da ka mat treikam ba skhem ban kyntiew ïa ka mattithaw bad riti dustur.
Ha kane ka sngi u la plie ïa ka shlem pyninam MAD Gallery bad ïa ka jingpyninam jong u samla Mario Pathaw. Kum shi bynta jong ka jingpyninam la ioh ka jingkren ruh na u samla Frederick D Hynñiewta u ba la phnieng la ka jingtip bad jingshemphang ha ka kam thohdur ha ka ba u la ai ka jingiaroh ia ka National Education Policy ka ba thymmai ka ba la shimkhia bha ia ka mattithaw bad riti dustur.
Ka shlem pyninam MAD Gallery jong ka Riti Academy ka dei ka ba la kyrshan da I longkmie Kong Saihun Phanbuh na ka Kay Eem Dee Children Centre. Kane ka pyninam kan bteng haduh 22tarik Nailar, 2020.
