Nongkhyllem Jymmang 22: Da kajingthmu ban kham tip kham bniah ia ka jingdon jong ki jingthung jingtep ki samla pule jong ka Martin Luther Christian University kiba dei na ka tnad pulie ia ka jingthung jingtep kila leit ban jngoh ia ka Nongkhyllem Wildlife Sanctuary, kaba don ha Umling hapoh jong ka Ri Bhoi District.
Kane ka jingleit ka long ban hikai ia ki samla pule ban don ka jingiadei ia kaei kaba la hikai hapoh klass bad kaei kaba don shisha hapoh ka mariang. Ha dien ba la ioh ia ka jingbatai na ki ophisar kiba dei peit tei ka khlaw bala mang kyrpang da ka sorkar, na ka liang jong ki smala pule kila leit ban rung hapoh jong katei ka khlaw ban ioh da la ki jong ki khmat ia ki jingthung jingtep kiba bun jait.
Ka Nongkhyllem ka dei ka khlaw kaba ar ha ka jingeh ha ka jylla Meghalaya ha kaba la buh kyrpang ban shong ki mrad bad ka don haduh 29 Sq Kms. Bad ka wei pat ka dei ka Baghmara ha kaba ki don ki jaid syntiew bad ki mrad kiba bun jait ha Garo Hills kaba don tang 0.02 Sq Kms, ka Siju Wildlife Sanctuary ka don ha South Garo hills 5.18 Sq Kms bad kaba heh duh ka dei ka Narpuh Wildlife Sanctuary ha East Jiantia Hills 59.90 Sq Kms.
Wat la kane ka jingleit ki samla pule kim shym la ia kynduh kino kino ki mrad khlaw hynrei la ong ba ki mrad khlaw kiba don ha kane ka jaka ki long u khla ia u ba la tip kum u Royal Bengal Tiger, Indian Bison, Himalayan Black Bear, Clouded Leopard, Brown Hornbill, Manipur Bush Quail, Rufous Necked Hornbill, lem bad kiwei kiwei ki mrad kiba bun jait.
La iathuh ba ha kane ka khlaw labuh shibun ki komera ban ringdur ia ki mrad hapoh kane ka khlaw bad ban pynthikna ba kan nym don kano kano ka jingpynjulor ia kina ka liang jong ki briew. Na ka liang jong ki ophisar kiba la ialam lynti ia ki samla pule ki long u Bah JM War, Forester One, Beat Officer Lailad Forest Beat, u Bah Nip Syngkli, Forester bad u bah James Rani, Forest Guard baroh ki ophsar ki dei na katei ka jaka.
