Shillong, Naiwieng 12: Mynta ka sngi ka NESFAS, kala pynlong ia ka jingai jinghikai hapoh jong ka shnong Laitsohpliah bad ki shnong ba marjan kiba hap hapoh jong ka East Khasi Hills, kumno ban pynkylla sboh na ki niut ki niew kiba don hapoh jong ka mariang, ha kaba la ai jinghikai da u Dr. Carl O. Rangad Vice Chairman, ka NESFAS.
KI shnong kiba la wan ban ia shim bynta ha kane ka jingai jinghikai nalor ka shnong Laitsohpliah ki long ka Laitthemlangsah, Nongtraw bad Dewlieh. Kane ka jinghikai ka wan ha dien ba ki paidbah na katei ka thain kila kyrpad ia kane ka kynhun ban wad kilad ki lynti kumno ban pynim biang ia ka khyndew.
Kane ka jinghikai ka long ban hikai ia ki briew kumno ban pynmih ia ka sboh na ka khyndew khlem da pyndon kam ia ki dawai, la ong Dr. Carl Rangad, ia kane ka sboh ka long ban pyndon kam pat ha ka rep ka riang namar ka jingpyndon kam ia ki dawai ka ktah shibun ia ka khyndew.
Ka kong B. Swer na ka shnong Laitsohpliah, kala iathuh ba ki kmie ki kpa jong ka ha ka por ba ki dang khynnah kila juh hikai ia kane ka rukom pynmih sboh ha ki jaka rep, hynrei da ka jingwan ki dawai sboh kala pynduh noh ia kane ka rukom leh bad mynta kala pynsniew kylla ia ka khyndew.
U Dr. Carl , u la ong ba “ Haba iohi u briew u ngeit” na ka liang jong ka seng kan dang iai beteng ia kane ka jingai jinghikai sha ki paidbah ban pynsngewthuh ia ki briew ba kin kiar na kaba pyndon kam ia ki sboh dawai.
