Shillong, Lber 10: U myntri rangbah ka jylla u Dr Mukul Sangma haba jubab ia ka jingiakren halor ka jingkren jong u Lat ka jylla u Banwarilal Purohit hapoh ka iing dorbar thawain ain mynta ka sngi, la iathuh ba ka sorkar kala ioh ia ka sanction ban tei ia ka Shillong Engineering College, ha Shillong bad ia ka College of Urban planning and Architecture ha Tura.
Haba jubab ia ki jingiatai halor ka jingkren jong u Lat hapoh ka iing dorbar na ka liang jong u myntri rangbah u la pynpaw ia ka jingsngewnguh ka jong ia ki dkhot baroh kiba la ia shim bynta na baroh ar liang, na ka liang pyrshah bad na ka liang synshar, dei ha kane ka jingiatai ba ka sorkar ka ioh shibun ki jingtip bad kum juh ki jingai jingmut na ki dkhot jong ka iing dorbar namar ka jingkren jong u Lat ka kren ia ki polisi trei kam jong ka sorkar.
U myntri rangbah u la ong haba u la sngap ia ka jingkren jong baroh ki dkhot jong ka iing dorbar haba ki ai ia ka jingkren ka jong ki ki kham ban jur ia kawei ka phang bad kata ka long halor ka jingshah leh bein jong ki kynthei khynnah bad ka shong suk shong sain.
Haba ia dei bad kane ka bynta u myntri rangbah u la ong ba ka sorkar kala shim shibun ki lad ki lynti ban ia khun pyrshah ia kane, nalor kiba la ia kren hapoh ka iing dorbar ha kine ki sngi, ka sorkar kala thaw ruh iaka Directorate of Prosecution bad ia ki rule jong kane ka sorkar kala dep shna, lada kan kam don kan long ka jingeh kaba khraw.
Haba ia dei bad ka jingjyllei jong ki Drugs, ia kaei kaba la kdew da u MLA jong ka Shillong West u Bah Paul Lyngdoh, u la ong ba ka sorkar kam shym shong klit kti ha kaba ia dei bad kane ka kam, ka sorkar ka don kam ia ka jingiatreilang na baroh ki liang, lada ia kren ia ka lawei jong ki pateng ban wan hap ban leh ei ei mynta bad lada ka sorkar kan leh kan don ka jingktah iano iano hynrei na ka bynta ka jingbha hap ban leh.
Haba ia dei bad ka jingkynnoh ia ka sorkar ba kam shym leh ei ei ban ai jingiarap ia ki dkhot jong ka seng ANVC kiba la wan sha ka miet jingiasuk ka sorkar kala ai jingiarap ia ki 367 ngut bad ka jinglut kala kot sha ka T.5.5 klur tangka. Haba ia dei bad ki dkhot jong ka ANVC(B) ka jingbakla kam dei na ka sorkar hynrei ba kim shym la ai ia ki Bank Account kiba biang ban thep ia ka pisa, ka sorkar ka dang bethah ia ki ba kin ai ia ka Bank Account kaba biang haduh mynta tang 11 ngut kiba la lah ban pynbiang. Ban kynnoh ia ka sorkar ba kam shym leh ei ei ka long kaba bakla.
U myntri rangbah u la ong ka sorkar kala thoh ia kaei kaba ki dkhot jong ka iing dorbar kila kren wat lada ym lah ban ai ia ka jubab, la ka long ia kajingmyntoi jong ka jylla baroh kawei, la ka long ia ki District lane wat ia ki Constituency jong u wei pa u wei u MLA bad ka sorkar kan sa shim khia ia kaei kaba dei ban leh na ka bynta ban kyntiew ia ka jylla.
