Shillong, Rymphang 20: U Myntri rangbah ka jylla u Conrad K Sangma haba jubab ia ka jingkylli jong u bah Gabriel Wahlang, la iathuh hapoh ka iing dorkar ba iaka Tura ka nongbah jong ka West Garo Hills District bad ka Jowai ka nongbah jong ka West Jaintia Hills District kum ki Smart Towns.
Ka sorkar kala dep ban mang pisa ban pyntrei kam ia ka skhim kiba bun rukom ha kine ki ar tylli ki jaka sor, na ka bynta ka Tura la mang pisa T.338.152 klur tyngka bad na ka bynta ka Jowai la mang pisa T. 79.8 klur tyngka.
Haba jubab ki jingkylli bynrap u myntri rangbah ka jylla u la ong ba kam don kano kano ka kyndon haba jied ia kitei ki ar tylli kum ki Smart Towns, hynrei ki dei ki jaka sor jong ki ar tylli ki thain kiba la rim bha ha ka jylla.
U myntri rangbah u la ong shuh shuh ba leh se ka sorkar dan don noh ruh ia ki kyndon ban jied ia ki Smart Town bad ka sorkar ka kwah ban baroh ki nongbah jong ki District yn ithuh noh ia ki kum ki Smart Town ha ki snem ki ban dang wan.
