Shillong, Risaw 17: U president jong ka MPCC u Bah DD Lapang mynta ka jan miet u la pynbna ba na ka liang jong ka party kala pdiang ruh ia ka jingresign noh jong ki lai ngut ki MDC na ka party bad kito ki long u Bah Albinus Lyngdoh, Bah Voctor Ranee bad uBah Hedrian Lyngdoh.
Haba kren ha ki nongthoh khubor, u Bah Lapang u la ong ba ia ka Mawsynram BCC bad ia ka Mawkynrew BCC la pynwai noh. Ia kane ka leh ha dien ba ka seng kala saspon noh ia u Bah PN Syiem bad kila pdiang ia ka shithi jingmih noh jong u Bah Banteidor Lyngdoh na ka seng Congress.
Haba ia dei bad u Bah Vincent H Pala MP jong ka seng, u president jong ka MPCC, u la ong ba ka jingialeh pyrshah seng ka jong u MP ka long kum u CEM jong ka KHADC, hynrei namar ba u dei u MP kim lah ban shim rai kin pyntip sha ka AICC ba kan leh ia kaba don kam.
