Shillong, Iaiong 16: U Chief Electoral Officer jong ka jylla Meghalaya u Dr. BDR Tiwari mynta ka sngi u la iathuh ba baroh 40 kompnei ka kynhun Central Reserved Police Force (CRPF) kila poi lut sha ka Meghalaya ban pahara ha kane ka elekshon MP sha Lok Sabha 2024.
Na ka liang jong ka tnad elelshon kala dep ban pynkhreh ia ki jaka thep vote ha baroh ki jaka thep vote ha ka jylla bad namar kala dei ka por la pynkhreh ruh ia ki jaka rieh slap na ka bynta ki briew ki ban wan thep vote ban lait na ka jingshah slap.
Na ka liang jong ki ophis jong ki Deputy Commissioner bapher bapher kila pynlong ia ki jingpynshai paidbah ban pynshlur ia ki ban ia mih paidbah bad ban thep ia ka vote ka jong ki bad kila trei shitom ban pynthikna ba ki paidbah kin mih ban thep vote.
Ka jingkanbas elekshon na ka bynta kane ka Lok Sabha elekshon 2024 kan kut la shai ka sngi por saw baje noh phai sngi bad ka jingiathep vote kan long ha ka 19/Iaiong/2024 hakaba ki paidbah ka jylla kin jied ia ki nongmih khmat na ka jylla ban phah sha Lok Sabha.
