Shillong, Kyllalyngkot 27: U Sordar jong ka Raid Majai u bah Ethel Marwein u la kren ha khmat jong u Chief Executive member jong ka KHADC, u Bah HS Shylla halor ka jingsynshar don bor jong u Syiem jong ka Hima Sohra hapoh kane ka jaka.
Ha kane ka jingialang kaba la long ha ka sngi Saitjain ha Majai, ka long ba ia ka majai la kam nongkynti da ka Hima Sohra da kaba ia bujli bad ka Saitsohpen ka bym dei ka jingshisha bad kaba sngewsih ka long ba la knieh ia ki jaka na ki trai jylla bad ai pat sha kiwei pat ki bym dei ki trai jylla.
La ong ba u Syiem jong ka Hima Sohra, u la juh ai da ka mukot duma pyrshah ia ki trai jylla ban knieh jubor ia ki jaka. Ha ka juh ka por u Syiem ka Hima Sohra u la thaw ia ki Molor ba kin lah ban ai ia ki jignthoh bad kila lap ba la don ka jingjia ha kaba u Syiem ka Hima Sohra kila ai jingthoh ba u dei u trai shnong u bym dei na Majai.
Kaba sngewsih ka long ba 70% ka jaka jong ka raid la ai noh sha ki bym dei ki riewlum la leh ia kane da ka ophis jong u Syiem jong ka hima Sohra ha kaba ka dorbar riaid kam juh tip ia kata. Kumba ka long kane ka jaka ka dei khaii bad ka Bangladesh bad ka dorbar shnong kam juh tip ei ei la leh ia kane da ka ophis jong u Syiem jong ka Hima Sohra.
La iathuh ba ha ka shisngi ki trok ki iaid haduh 500 lane 600 tylli ki trok kiba iaid na kane ka jaka bad ia ka musur la lum da ka ophis u Syiem jong ka hima Sohra hynrei kim leh ei ei na ka bynta ka roi ka par jong kane ka jaka kaba ki paidbah ki ia kynduh jingeh.
