Shillong, Lber 05: Mynta ka sngi la sdang biang ban pyni ia phlim 9-Lad ha Bijou Cinema bad kane ka dei hadien ba la sangeh noh ban pyni namar ka jingpynjari curfew da ka sorkar jylla ha ki bynta jong ka Khyndailad bad kumjuh ruh ha Iewduh.
Lah ban pynkynaw hangne ba ia ka Film 9-Lad la pyllait paidbah (Release) ha ka 28 tarik u Rymphang, 2020 bad ha katei ka sngi da ki hajar ngut ki paidbah ki la iatuid sha Bijou bad kumjuh ruh ha Galleria, Anjalee na ka bynta ban leit peit ia kane ka phlim kaba ki paidbah ki la ap khmih lynti la slem.
Na ka liang jong ki paidbah kiba la iohi ia katei ka phlim ha katei ka sngi ki la ai ka jingiaroh bad ki la iathuh ba ka long kaba itynnad. Kumta ki paidbah ki lah ban sdang leit peit noh biang ia kane ka phlim kaba la sdang biang ban pyni mynta ka sngi kaba la lait curfew.
Haba iakren bad u producer bad kumjuh ruh u Director jong kane ka phlim u bah Commander Shangpliang u la iathuh ba mynta ka sngi la sdang ban pyni tang ha ka por 1 baje nohphai sngi bad u la iathuh lashai ruh kan dang bteng ha ka por 1 baje, hynrei ynda la lait curfew yn sa sdang pyni biang baroh 5 show. Namar ka por ba la buh ba pyni ka dei ha ka por 11AM, 1PM, 3PM, 5PM bad ha ka por 7 baje janmiet. Hynrei mynta yn pyni tang ha ki por ba lait curfew ,u la bynrap.
Na ka liang jong u bah Commander u la kyrpad ia ki paidbah ba kin iai shah halor kane ka jingbym lah ban pyni bad u la kular ba ia kane ka phlim kaba la angnud da ki paidbah yn dang pyni beit khamtam ynda la lait ka curfew. U la iathuh ba lashai ka sngi yn sdang ban pyni naduh ka por 11AM bad kumjuh ruh ha ka por 1PM.
