Shillong, Kyllalyngkot 17: U Takam Sanjoy dkhot jong ka AICC, u la ong b aka seng Congress kala shai ka sngi ha kylleng jong ka Ri India kin leit ban kerkut ia ki jaka trei kam jong ka Reserved Bank of India (RBI) bad ha kane ka nongbah Shillong ruh ki nongialam jong ka seng Congress kin leit ban ker kut la shai ka sngi ha ka por 10.30 baje mynstep.
Haba kren ha ki nongthoh khubor ha dien ka jingialang jong ka seng Congress mynta ka sngi ha Congress Bhavan, u la ong b aka seng kala pynkhreh ia shibun ki jingiakhih paidbah ban pyrshah ia ka jingpynduh noh jong ka sorkar u Narendra Modi ia ka Lut san spah bad ia ka Lut Shihajar kaba la ktah ia ka ioh ka kot jong ka Ri India.
U la ong ba shuwa ban pynduh ia kane ka Lut san spah bad ka Lut Shihajar ka jingkiew ka ioh ka kot jong ka Ri India ka long 8% ha ka GDP, hynrei mynta kala hiar sa tang 6.6% ha ka GDP bad kane kan long ka jingma kaba khraw ia ka ioh ka kot jong ka Ri.
Kane ka jingpynduh noh ia ka Lut sanspah bad ia ka Lut Shijar ka dei ka jingjot ia ka Ri la kumba khi u jumai bah, la ong u Takam, ban pyrshah ia kane ka seng Congress kala pynlong ia shibun ki jingiakhih ban pyrshah ia kane ka jingsynsahr don bor jong u Modi. Na ka liang jong ka seng Congress ka khot ka were ia ki seng bhalang ba kin ai ka jingkyrshan.
Na ka liang jong ka seng Congress kan sa leit sha ki District, ki shnong ki thaw ban pynshai paidbah ia ka jingduh na kane ka jingleh jong u Modi, la ong ba katba ka seng Congress ka dang ialeh ban pyniatylli ia ka Ri India, ka BJP ka dang ia leh ban pyniapaid ia ka Ri, la kynnoh u Takam nongialam ka seng Congress.
Ka jingleh jong u Modi ban pynduh ia ki Lut san spah bad Lut shihajar kala ktah ia ki iing mane, ki Mosque, ki Temple. Ka seng Congress ka ioh ia ka jingma kaba ap ia ka Ri na kane ka jingleh jong u Modi, ka seng hapoh ka jingialam jong u Rahul Gandhi kan ialeh ban pynsngewthuh ia ki paidbah jong ka Ri ia ka jingma jong ka Ri, la ong ba kane ka sorkar jong u Modi ka long pyrshah ia kiba duk bad ka iarap tang ia ki katto kantne kiba riew spah.
