Shillong, Jylliew 20: Ka national commission kaba dei peit ia ki Riewlum ha kane ka Ri India mynta kala pynkhreh ban rah noh ia kane ka ophis kaba don ha Shillong sha Guwahati. Kane ka ophis kaba la don ha Shillong la peit da u Assistant Director.
Katkum ki khubor kiba la ioh da u Sp News Agency ki ong ba na ka liang jong u chairman kane ka Commission la dep ban shim ia ka rai ba dei ban rah noh ia kane ka ophis na Shillong sha Guwahahti mynta dang ap sa tang ia ka hokum ba kan mih.
Haba la ioh ban ia kren bad u Assistant Direcor jong kane ka ophis la pynthikna ba ka dei ka jingshisha ba ia kane ka ophis jong ka NC kaba dei peit ia ki riewlum la dep rai ban rah noh sha Guwahati bad mynta ki dang ap sa tang ia ka hokum, ka jingrah ia kane ka ophis sha Guwahati ka long halor ka nongrim ba katei ka jaka ka dei ka pdeng ia kane ka thain baroh kawei.
Kane ka ophis kaba don ha Shillong mynta ka piet ia ki hynniew tylli ki jylla kane ka thain bad kyntuplang ia ka Sikkim. Ki lad khubor ki ong ba kan long ka jingduh kaba khraw ia ka jylla lada kane ka ophis kan mih noh na kane ka jylla.
