Shillong, Jylliew 04: U Deputy Commissioner jong ka Ri Bhoi District mynta ka sngi u la pyntip paidbah ba ki bor jong ka District kila shim ia ka rai ban weng noh ia ka jingpynjari ia ka kyndon 144 CrPC na ka daw jong ka jingleh burom ia ka jingdap 25 snem ba shitaiew lynter jong ka District kaban sdang la shai ka sngi.
Kane ka jingkhang ban ia lum paidbah ia kaba la pynjari hapoh ka District baroh kawei la weng noh da ka hukum jong u Deputy Commissioner kaba la pynmih mynta ka sngi, ia kane ka rai la shim namar ba ka don ka jingleh burom ia ka jingdap 25 snem jong ka Ri Bhoi District.
La ong ruh ba na ka liang jong ki seng bhalang ki riew paw khmat jong ka District, kila kyrpad ia ki paidbah jong ka Ri Bhoi District baroh kawei ba kin pynneh ia ka shong suk shong sain bad kila kyntu ia ki bor jong ka District ba kin wengnoh ia ka jingpynjari ia ka 144 CrPC kaba la khang lad ia ka jingialum briew.
Ha ka juh ka por la ong ba wat la ka weng ia ka jingialum briew, na ka liang jong ki bor jong ka District administration ki khang ban yn nym shah iano iano ban rah ia ki tiar ba lah ban pynmynsaw. Na ka liang jong ki bor ba dei peit ia ka District kila pynbiang ia ki lad pahara baroh ban peit ba lada don kano kano ka jingjia ki lah ban the la kam ha kine ki sngi ba don ka jingrakhe ia ka jingdap 25 snem jong ka District.
