Mawkyrwat, Jylliew 28: Ka KSU South West Khasi Hills District ka phah iaka khubor sha Ka sorkar bad sha ki paitbah jongka bri u Hynniewtrep ba ka seng ka la long ba la pynkhreh ban iatyngkhuh bad ka sorkar Mynder United Alliance (MUA II) hapoh ka jingialam jong U Mukul Sangma lada kan long da kano kano ka rukom ruh haba iadei bad Ka jingpyrshah iaka jingshna iaka lynti rel hapoh ka bri u Hynniewtrep. Mynta ki dang ap iaka rai jongka Sengkmie bad kum ki dkhot jongka South West Khasi Hills District Unit ki la long ban pynkhreh ban pyntyllun iaki shalyntem jongka jingialeh nangne shakhmat.
Naka liang jongka KSU South West Khasi Hills District Unit ki pynrem jur iaka sorkar Meghalaya hapoh ka jingialam u Mukul Sangma kiba la ialeh pyrshah iaka mon jong u paitbah trai ri trai muluk daka ba wanrah jubor iaki mynder naki jylla aiu re sha Meghalaya lyngba ka lynti rel. Kane ka paw baka sorkar ba mynta jong ka Jylla ka dei ka agent jongki Mynder bad Ka sorkar ka bym kwah ruh ban trei eiei na bynta u paitbah hynrei kaba pyrkhat synnia sngi tang kumno ban pynsyaid iaki seinpuh ba kin ioh puh kylla ia u trai ri trai muluk, kynnoh ka KSUSWKH.
Ka jingwanrah iaka lynti rel bad ka jingialam bakla ia u paitbah haka kyrteng jongka roi ka par ka dei tang ka ktien shu thaw naba kumno u trai ri trai muluk un roi u par haba u nongwei un sa wan tuid manka sngi ban pynlong ritpaid iaki trai ri. Lada ka sorkar jin lada ka dei kaba don ka jingkitkhlieh ia u paitbah kan jin da la pyrkhat shwa kumno ban wanrah iaki ain ba khlain ban iada iaka influx ym ba kan shu khohreh ban shna shwa iaka lynti rel. Ka sorkar ba don jingkitkhlieh kala dei ban pyrkhat shwa ban iada iaki trai ri trai Muluk ym ban kdup ia u mynder. Kumba Ka la paw Ka sorkar hapoh ka jingialam jong u Mukul kam dei shuh ka nongiada ia u trai ri.
Shuh shuh ka seng ka pynrem jur iaka jingpharep jubor ki pulit iaki dkhot ka seng ha kylleng Ka bri u Hynniewtrep kum ki nongleh kam bymman, ngi pynrem jur iaki bor pulit ba ki la leit thwet bad pyndik iaki ing ki sem bad bahaing jongki dkhot. Ki pulit ki ju pyndik iaki dkhot jongka seng hynrei ki pat kim ju leh Kumta hynrei lada kin iaibteng kan sa poi Ka por ba ngin Pyrkhat Da kumwei. ki kwah ban buh jingkylli iaki bor pulit ba kaei ki la Leh ban rat dyngkhong iaka bamsap, ki la lah ne em ban pynkut iaki kam khaii drok, ki kam rahbor bad dawa pisa haki thain khappud bad ki kam thombor iaki kynthei.
Ki bor pulit ki la dei ban pynshai paitbah Katno tylli ki case batbor iakiba ym pat shym la iohkem ne chargesheet pyrshah iaki runar namar haka jinglap ngi la iohi Ba Ki don kiba kum kine ki case batbor iaki khyllung bad khynnah kiba ki pulit kim shym la iohkem iaki runar haduh mynta wat hapoh jongka South West Khasi Hills District.Ka Seng ka ai mynsiem iaki dkhot jongka North Khasi Hills District bad jongka KSU hi baroh kawei Ba ngi ruh ngi don ryngkat bad phi bad kila pynkhreh lypa ban iatyngkhuh iaka sorkar bad ban ieng skhem haka nongrim katba kum Ka rai jongka KSU Sengkmie. Kyntang iawai ka seng ka pynrem jur ia u DC bad SP jongka Ri bhoi District Namar Kumba ka paw dei kine ba nion iaki trai ri trai muluk bad dei maki ba wanrah iaka jingiasngewpher jaid kynja ha bri u Hynniewtrep Kumta Lada mih kano kano ka jingeh hadien haka jylla maki ki hap shim iaka jingkitkhlieh kynnoh ka KSUSWKH la ong u Bah Forwardman Nongrem President KSU SWKHD
