Shillong, Rymphang 22: U general secretary jong ka seng lehnoh kaba la shai niew beain ha ka sorkar u bah Sainkupar Nongtraw, ha ka kyrwoh kaba la phah mynta ka sngi u la ong “Lada kane ka Sorkar hapoh ka jingialam u Conrad ka kloi ban shimphrang ia kane ka bynta ka dei ban thung ia u Ksiang kampher lada ka thung da u General Secretary ka seng uba lah shongthait naka kam dangshen, ne kan thung da uno uno u briew uba maka ka ibit khnang ba ngin iohi iaka jingshai jong ka sngi”.
Naka por sha por ka HNLC kam pyrshah iaka jingsuk haba ka Sorkar ka plie iaka jingkhang, hynrei dei ka sorkar kaba pynlong kamkai ia kane ka phang, lada ka Sorkar ka kwah iaka jingiakren iasuk kaba khlem ki jingbuh kyndon te balei pat naka por sha ka por ka dang donkam ban buh kyndon ban pyndem shuwa ki tiarsiat nangta sa iakren, kane ka dei tang ka kambiej.
U tei u nongialam ka seng lehnoh HNLC u la ong ruh ba kaei kaba jia ha Kashmir, Manipur ne Assam ka dei ka jingbym lah ka Sorkar India ban wanrah lut ia baroh ki Seng kiengatiar halor ka miej jong ka Jingiakren, lada ka Sorkar ka kwah ban iakren bad ka HNLC ki long kiba lah kloi.
Haka juh ka por u la ong, kim kwah baka jingsuk kan pynkut biang ia ki haki surok bah ban rah lama iong ne shong shah thngan hakhmat secretariat kaban tan biang ia ki shadien iaka jingsdang ban kiengatiar sa shisien, ong u Bah Sainkupar Nongtraw General secretary cum Publicity secretary, HNLC ha ka khubor kaba la pynlait mynta ka sngi.
