Shillong, Rymphang 17: U Bah Banshai Marbaniangu la ong ba Hadien ba u la ioh iaka jingtip lyngba ka RTI napoh ka ophis jong u Deputy Commissioner jong ka East Khasi Hills District lyngba u Chairman jong ka Haat Management Committee ha kaba iadei bad ka jingpan jingtip jongnga halor ka rukom pyniaid ia ka Balat Border Haat lyngba ka Haat Management Committee kaba dei ka iew khaii pateng hapdeng ka India bad Bangladesh ka badon hapoh Balat khlem da pynslem nga la leit ban jngoh da la ki jong ki khmat la kalong ne em kumba ka paw hapoh ka kyndon treikam.
Katkum ka guidelines kaba la batai shai la ong ba kane ka Iew kanlong hapdeng ka India bad Bangladesh ha kaba la ai jingbit lyngba ki card ia ki 25 tylli ki dukan jong ka India bad 25 jong ka Bangladesh bad ki trai lane ki nongkhaii kiban shong ha kane ka iew kindei ki nongshong shnong kiba sah hapoh ka 5 km jong u radius katkum ka jingkhein kyllum ha baroh sawdong jong kane ka jaka kaba la pynlong iakane ka iew.
Katkum kaei kaba paw lyngba ka RTI, ka list ki nongshong dukan lane kita ki Vendors kiba ngi ju khot kiba bun kidei ki khasi bad don katto katne ngut kiwei de kiba lehse kilah ban dei ki nongshong shnong markhap bad katei ka jaka ba la pynlong ia katei ka Iew Border.
Ynda haba ngala pyrshang ban leit ban jngoh da la ki jong ki khmat u Bah Banshai Marbaniang u la lap pynban kalong da khongpong ha kaba bun na ki nongshong dukan kidei ki wei ki jaid bynriew kane kala pynshaiong iaka jingmut jingpyrkhat ha kano ka rukom ki iohlad ban shong die jingdie ha kane ka jaka ha kaba ia nujor katkum ka jubad lyngba ka RTI ka la iapher haduh katta katta khamtam lei lei ha kaba iadei bad ka kyrteng jong ki vendors.
Shuh shuh kaei kaba kham pynlyngngoh kadei lyngba ka jingdon ki nonglum khajna naduh ka bai ieng kali haduh kabai pynrung bad pynmih ia kitiar hapoh katei ka Iew. Haba ka la don ka jinglum iaka bai parking kali khlem da ai ki receipt kiban pynshisha ba kadon kaba kum kane, la dap da ka jinglyngoh bad kylli ba balei khlem da ai receipt. Hynrei ka jubab kaba la ioh ka long beit ba kala don ka jingpynbeit, kum ki nongtrei ymlah leh eiei.
Ym tang katta kaba kham shon shuh shuh iaka jingmut jongnga kadei ruh halor ka jingiathuh jong ki katto katne ki vendors ba kadon ruh ka jinglum iaka khajna ia ki mar ki mata napoh India kiba pynrung shapoh katei ka iew bad kumjuh ruh iaki mar ki mata jong ka Bangladesh kiba lasei na katei ka iew ban wan die shane shapoh India. Lada kadei ban lum ia ka khajna hato kandon jingeh aiu wat ban ai ia ki receipt kiba biang.
Ym tang katta nalor katei ka la don ruh ka jingpynduh ban ailad wat ban rung khamtam ia kito ki briew kiba ladep ban register kum ki Vendees naka bynta ban thied jingthied na katei ka iew ha kaba ki la pyrshang ban pyni da ka Vendees Card hynrei ki BSF kimtreh wat ban ailad iaki ba kinrung shapoh. Halor kane ka bynta ymlah ban sngewthuh balei la issue iaki Vendees Card bad ha kano ka rukom ki treikam khamtam haba ia nujor katkum ka guidelines ka la iapher bak ly bak khlem da iadei dur shuh wat tang khyndiat ruh namar ka kyndon ka ong ba tang kiba don iaki vendees card kilah ban rung shapoh bad ruh ban thied ia ki mar ki mata.
Kumta khlem da pynslem ia kane la leit ban iakynduh ia ka Chairperson jong ka Border Haat Committee Kong R. Ianhgrai, MCS kumjuh ruh ia U Deputy Commissioner jong ka East Khasi Hills District, Bah P. S. Dkhar, IAS ban kylli bniah halor kane ka bynta. Ka la don ka jingiakren katto katne por bad dei tad haduh ban da phah da ka jingthoh ban dawa ban thung da ka kynhun tohkit halor kane ka jingbym shai ia ka rukom pynbeit hapoh katei ka Iew Border namar kumba ka long ka don ka jingiapher khlem da iadei bad ka jingbatai katkum ka guidelines.
Haba la kylli ba balei haba kadon ka jinglum khajna ia ki mar ki mata kumjuh ruh wat ban lum ia ka bai ieng kali khlem da ai iaki receipt kiba biang hato shano kane ka pisa kanpoi bad balei la donkam ban lum ia ka bad mano ba la phah lum.
Na kaliang jong u Bah P.S. Dkhar, Deputy Commissioner, EKHDkumjuh ruh na ka Kong R.Iangrai, ka ba dei ka Chairperson jong ka HMC kila kubur ba kamdei bandon kumta ka jinglum bad lada dei ban lum ruh donkam ban issue da ki receipt kiba biang khnang ba kan long ka jingiarap naka bynta ki jingdonkam hapoh katei ka iew. Kane ka long katkum ka kyrwoh kaba la phah da u Bah Banshai Marbaniang.
