Shillong, Jymmang 28: Ka jingiakhih khohreh hapoh jong ka seng Congress ban bujli noh ia u nongialam jong ka Congress Legislature party (CLP) kala dang khluid, na ka liang jong ki MLA kiba kwah ban weng noh ia u Dr Mukul Sangma kum u nongialam kin ia kynduh shibit ha iing jong u Bah Lapang ban ia jied ia u nongialam jong ki ban phah sha ka AICC.
Ki thymmei khubor kiba ia jan bad ka seng Congress ki iathuh ba kin ia pynbeit shuwa para ma ki la u Dr Mukul yn pdiang ne em ia ka rai jong u ba bun ba lang da kaba hiar shuki da kaba suk, lada kane kam wan sha ka jingiasngewthuh jingmud ki MLA ba kwah ban pynhiar shuki noh ia u Dr Mukul kin ia leit sha Delhi ban pyni ha khmat jong ka president jong ka AICC ka Sonia Gandhi.
Katkum ki lad khubor la iathuh ba na ka liang jong ka AICC ha ka jingiakynduh u Bah Lapang ha Delhi bad ka Sonia la ong ba ka Sonia kala bthah ba kin ia pynbeit ia kane ka kam da kaba suk hynrei lada kam poi ha ka jingiasuk kam ban se ban khot noh ia ki sha Delhi ba kan ai ia ka rai lada kan weng noh ia u Dr Mukul ne kan dang pynneh.
Bun na ki MLA jong ka seng Congress ki kwah ba ka AICC ka dei ban sngap iaka jingsngew jong u ba bun ba lang bad kumba ka long mynta lada ka AICC kam treh ban sngap ia ka jingdawa jong ki MLA kiba don ha ka jingbun paid ka party Congress kan lah ban poi sha ka jingkad ar liang.
Katkum ka Ten Schedule jong ka Riti Synsahr jong ka Ri India, lada kwah ban mih noh na ka seng kaba jop iaka elelction don kam ban don ki dkhot lai pawa na ka jingbun paid lem kumta kin ngap ha ka jingshah mait kyrteng. Kumba ka long ka seng Congress hapoh iing dorbar thawain jong ka jylla ka don 30 ngut ki MLA bad katkum katei ka jingkhein ban pynpra ia ka seng congress ki don kam ban don 20 ngut ki MLA ban ia mynjur lang.
