Shillong, Rymphang 23: Ka kynhun jong ka Meghalaya Joint Action Committee (MJAC) ki ba kynthup ia ka Association of Meghalaya Traders and Transporters, Jaintia Hills ruck Owner Association bad ka All Jaintia Hills Cement Clincer Association mynta ka sngi kila pynpaw ia ka jingeh ba ki ia kynduh ha ka ba iadei bad ka jingkhapngiah ka Dawki Land Custom.
Ha kaba ki la shem jingeh wat tang ban ioh ia ka clearance na ka bynta ki truck kit mar ba kin rung sha Bangladesh ka ba lah ban shim por ha duh ki saw ne san sngi na ka daw ka jingbun palat ki truck.
Na ka liang u bah N Pasi u la ong ba na ka liang JAC ka la dawa na ka Sorkar ba ka la I donkam ban don noh kawei ka Land Custom ha poh Jaintia Hills. U la ong ba ha duh mynta ki truck ki ba hap ban rung sha Bangladesh ki hap ban iaid lyngba tang na ka Dawki.
Kane kala wan rah ia ka jingkhap ngiah ha kane ka jaka ha ka ba ka la shimpor ruh ha duh saw ne san sngi ia ki truck ba kin ioh ban rung sha Bangladesh. U la ong ruh ba na ka liang ka Sorkar ka la dei ban plie noh ia ka Kuliang Land Custom Station khnang ba lah ban weng ia ka jingkhap ngiah.
U bah Pasi u la ong ruh ba la da ka sorkar ka plie noh ia kane ka Land Custom ka ba don ha Kuliang na ka liang ka Sorkar kan lah ban pynmih ia ka khajna bad kan kham pynsuk ruh ia kine ki nong khaii.
U la buhruh ka jing kyrpad ia ka sorkar Jylla ba ka dei ban shim khia ban ia kren bad ka Sorkar India ha ka ba iadei bad kane ka bynta ban plie ia kane ka Land custom ka ba la don kam kyrkieh na ka bynta ki paidbah ka Jaintia Hills.
U bah Pasi u la ong ba ha ka ba iadei bad ka khajna na ka bynta kine ki company ki ba don ha Jaintia Hills na ka liang ka JAC ka la ong ba ka sorkar ka dei ban shim khia lang kum ba shim khia ia kine ki nong khaii trai jylla khnang ba ka Jylla kan ymduh nong.
