Shillong, Iaiong 01:Ka Confederation of Ri Bhoi People (CORP) sengkmie ha ka jingleit jurip jongka ia ka ophis jong u Block Development Officer (BDO) Jirang C&RD Block dang shen ka la lap ba katei ka ophis kam shym la don wat tang uwei ruh u nongtrei hapoh ophis, katba ka ophis ha katei ka sngi ka plie rynghang baroh ki kamra lait noh ka kamra jong u BDO kaba la shu pynwoh da u huk ia ka jingkhang ban pyni ba ym don briew eiei.
Ka CORP ka pynpaw ia ka jingkyndit bad bitar ban iohi ba katei ka ophis kaba dei peit ban pyntrei ia ki shkim bapher bapher jong ka sorkar Jylla bad kumjuh ruh jong ka sorkar pdeng na bynta ka roi ka par ki paidbah ha ki shnong kyndong ka long pynban kum ka iingjah.
Halor kane ka seng ka la ioh ruh ia ka jingujor na ki paidbah ba ki nongtrei ha katei ka ophis naduh u BDO haduh kiba rit kim juh poi thikna sha ophis hynrei ki leit ki wan katba ki mon kaba la wanrah jingeh ia ki paidbah kiba leit ban pyndep ia ki kam ki jam jongki kiba iadei bad ka Block.
Kumta, ka CORP ka maham ia ki nongtrei Block Jirang ba kim dei ban lehmon bad lada ka dang lap kam banse ban leh tyngeh da kiwei pat ki lad jingiakhih ne wat ban khang tala syndon ia katei ka ophis, namar ka sorkar Jylla ka la buh kyrpang ia katei ka ophis na bynta ban pynsuk ia ki paidbah ka thain Ri Bhoi sepngi khang ba kin lah ban pyndep ia ki kam ki jam ha ka por ba biang, hynrei ka long pynban ka ophis ha kaba ki nongtrei ki leit ki wan katba ki sngewbit ia lade katba ki paidbah pat ki nangjakhom na ka por sha por. Kane ka long katkum ka kyrwoh ba la pyllait da u Bah G.S Hat, Publicity Secretary CORP sengkmie.(SP News)
