Shillong, Nailar, 19:ka Khasi Students Union (KSU) Mawlai Circle ha Mawlai Nongkwar, ka la leit ban khynra ia ki Work Permit bad Labour License ha ki lai tylli ki jaka die kali kiba don ha Mawlai , ha Modrina Auto Enterprise, Banalari World Cars bad ha Stanley Roy Mahindra Service.
Ka seng ka la ai por hapoh ar taiew ia ki trai aikam ba kin pynbiang ia ki kot ki sla ia baroh ki nongtrei bar jylla bad lada ki trai ai kam kim lah ban leh ei ei ka Seng ka la byrngem ba kan pynsangeh shwa ia ki nongtrei baroh kine trai die kali kiba don ha ka jylli jong ka shnong Mawlai ki la pynpaw jingeh sha ka KSU halor ka jingpynslem jong ka Labour Department ban ai ia ka Work Permit sha ki nongtrei bar jylla ba ki aikam.
U Biangbor L.Paliar, President ka Mawlai Circle, haba kren ha ki nongthoh khubor hadien ka jingkhynra, u la iathuh ba ha ka jingkhynra ha Banalari World Cars ka Seng ka la lap ba ki don34 ngut ki bar jylla kiba trei ha kane ka jaka die kali ha kaba kim don satia ia ki kot ki sla kiba biang bad na ka liang ki bor pyniaid ki la kular ba kin pynbiang noh ia ki kot ki sla.
U la iathuh ba ka Seng ka la lap ba ki don 15 ngut ki nongtrei bar jylla ki don tang ka Labour License na ka KHADC kaba wat ka Validity ruh ka la kut naduh u Lber jong u snem 2013 khlem da pynthymmai haduh mynta bad ha kajuh ka por kim don satia wat ia ka Work Permit na ka Labour Department. `
Ha ka jingkhynra ha Stanley Roy Mahindra Service ka seng ka la lap ba ki don 17 ngut ki nongtrei bar jylla ha kane ka jaka die kali ki bym don ia ki kot ki sla kiba biang
U Bah Godwin Lakiang trai ka Banalari Worl Car u la ong na ka liang jong ngi kum ki trai aikam ngi ialeh katba lah hi ban pynbiang ia ki kot ki sla khamtam ia ka Labour License na ka Labour Department bad na ka KHADC hynrei haduh mynta ka tnat Labour kam pat lah ban ai ia ka Labour License na ka daw ka jingbym pat pyndep jong ki pulit ia ka Police Verification ia ki nongtrei. Hynrei kaba ki don ka dei tang ka EPIC kaba pynshisha ba ki dei ki nong India.`
U ong ruh ba katba lah ngi pyrshang katba lah ban ai aikam shwa ia ki briew la jong ha baroh ki kam kiba lait hynrei laitnoh tang ha ki kam kiba eh kiba ki briew jong ngi kim lah ngim banse ban khot ia ki ba nabar.
U General Manager ka Stanley Roy Mahindra Service u Bah Sanbor Roy Thangkhiew u iathuh ba kum u trai aikam u la phah da ka jingthoh sha ka Labour Department bad sha ka KHADC hynrei haduh mynta kine ki ar tylli ki tnat kim shym la leh ei ei.
U la ong ruh ba ka jingthungkam ia ki bar jylla ka long ha ka Technical kaba ki trai jylla kim pat lah satia ban trei khamtam na ka jingwan poi ki kali thymmai. Hynrei lada ki don ki ki briew jong ngi kiba lah ban trei ia kane ka kam ngin jin da la pynrung shwa ia ki nyngkong eh.
Ka KSU ka la pynpaw ia ka jingsngewsih jur namar ba katba ka seng ka dang tehlakam na ka jingwan rung laitluid ki bar jylla hynrei na ka liang ka Labour Department ka dang pynslem ia ka jingai ia ki Work Permit ia ki bar jylla, bad kane ka jingleh jong ka labour department kaba buh ia ki nongaikam ha ka jingeh.(SP News)
