Shillong, Jylliew 01: Kum shibynta ban rakhe ia ka sngi pynneh pynsah ia ka Mei-Mariang, ka Synjuk ki Seng Samla Shnong (SSSS), South West Khasi Hills District, ka la leit jurip ia ki painkhana jong ki skul, bad ki Painkhana Paitbah bad ia ki jaka theh ñuit kiba don hapoh ka Head Quarter jong ka District, Mawkyrwat mynta ka sngi. Ha kane ka jingleit jurip, ka Synjuk ka la lap ba don tang katto katne ki painkhana bad ki jaka theh ñuit jong ki skul kiba biang bad kiba leh khuid, ki bym don jingma ia ka koit ka khiah jong ki khynnah skul. Hynrei la lap ruh ba don ki skul kiba isaitmet ban peit naduh ka jingsma iwtung haduh ka jingjaboh kaba buh jingma ia ka koit ka khiah jong ki khynnah skul.
Ka Synjuk ka dap da ka jingsngewkhia hadien ba ka la ioh ban leit jurip ruh ia ki Painkhana Paitbah (Public Latrine) hapoh iew Mawkyrwat, ka la lap ia ka jingbymbiang naduh ka jingsma iwtung, ka jingjaboh na ka jingtuid jong ki um jakhlia bad kane kan wanrah ia ka jingma ia ka koit ka khiah jong ki paitbah nongshong shnong baroh.
Kumta ka Synjuk ka kyntu da ka jingsngewrit bad da ka jingsngewkhia ia ki bor pyniaid jong ki skul bad jong ki Iew ki Hat ba ki dei ban shimkhia bad ban leh eiei na ka bynta ka jingkhuid jingsuba, ka jingkoit jingkhiah jong ki paitbah, ki Khynnah Skul bad ia ka Mei-Mariang. Ka Synjuk kan nym shong kli kti bad kan nang iai buddien ban weng ia kitei ki jingeh khamtam kaba ktah ia ka jingkoit jingkhiah jong ki khynnah skul bad ki paitbah namar ka long lehnohei lada ngi rakhe pynneh Mei-Mariang tang na shabar lymda ngim don ka jingiatreilang bad ban sdang shuwa na la rympei.
Ha kawei pat ka liang, ka SSSS, SWKHD ka ai khublei kyrpang ia ki Khynnah Pule baroh kiba la leh bha ha ki Exam jong ka SSLC bad HSSLC jong kane ka snem, kumjuh ruh ia baroh ki nonghikai skul kiba la trei shitom met bad mynsiem ban pynkiew ia ka pule puthi hapoh ka District hi baroh kawei.
