Shillong, Naitung 18: Ki pulit jong ka nongbah Shillong ha ka 17 tarik mynta u bnai kila lap ia kawei ka jaka ha Mawlai Mawtawar kaba dang shutih thymmai bad ha dien ba la khlong ia kane ka jaka ha ka jingdon lang jong ki magistrate la lap ia kawei ka met ba khlem jain khlem nep kaba dei jong u samla briew bad ki pulit ki suba jur ba kalah ban dei jong u samla ba la jah.
Ha ka jingpynlait khubor jong ki pulit mynta ka sngi la ong ba ka kong Specially Wanniang na ka shnong Mawtawar Laitlum kala ujor sha ki pulit ba u khun jong ka u Damankhraw Wanniang u la jah na iing naduh ka 27 tarik jong u bnai ba la dep.
Dei ha ka saw tarik mynta u bnai la ioh ia ka phone ban dawa pisa laiphew lak na ka bynta ban pynlait ia ukhun jong ka da kaba ong ba u khun jong ka u don ha ka kti jong kine ki briew kiba phone ia ka.
Halor jong kane na ka liang jong ki pulit kila rah ia ki san ngut ki briew ban tohkit bad kine kiba la shah rah ha ki pulit ki long u Klemenroy Nongtri na Mawlai Nongkwar, u John Fishal Lyngkhoi na Mawlai Mawtawar, u Richard Wahlang na Mawlai Nongkwar u Shanborlang Rani na Mawlai Syllai Kariah bad u Kitboklang Kharsyntiew na Mawiong, hynrei kine baroh kila ia trei lang bad ki pulit ha ka jingtohkit.
Dei ha ka 17 tarik mynta u bnai ki pulit kila ioh ia ka jingtip ba ka don kawei ka thliew kaba dang thymmai ha khlaw Mawlai Mawtawar haba la tih ia kane ka jaka ha ka jingiadon lang ki magistrate la lap ia kawei ka met iap kaba la pyut bad la ngeit ba kane ka met ka dei jong u samla ba la jah, ka jingtoh kit ka dang iaid ong ka khubor pulit.
