Shillong, Iaiong 08: Ka jingsniew jong ka surok ban leit sha Mawiet ka dei kaba la palat liam ha kaba ym don kyntiewn shuh ban batai, u President jong ka Hynniewtrep Achick National Council (HANC) u bah Ricky Sohlang u la ong ba lada ka sorkar kam leh ei ei, ki paidbah ka thain kin nym ia shim bynta shuh ha baroh ki election khamtam eh ha ka MLA 2018.
Ia kane ka surok na Nongstoin sha Mawieit la pyntrei ha u snem 1963-1964 ha ka por jong ka sorkar Assam, hynrei kane ka surok ka dang sah kum juh bad katba dang mih ki sngi kala dang sniew dang sniew. Ka seng ka pynkynmaw biang ba ha ka jingialang paidbah ha u snem 2015 ki paidbah ka thain Maweit kila shim ia ka rai ba lada ka sorkar kam leh ei ei ha u snem 2017, mynta u snem ki paidbah ka thain kin nym ia shim bynta ha ki election baroh ki ban dang wan.
Ha u bnai Jylliew 2016, ka seng kala phah da ka jingthoh sha ka sorkar pdeng bad kum juh sha ka sorkar jylla ba dei ban pynbha ia kane ka surok na Nongstoin sha u Nongjri kaba iaid lyngba ka thain Maweit bad Kulang kaba jrong kumba 73 km, ha kane ka jingthoh kaba la phah sha ka sorkar pdeng la ong ba dei ban pynheh noh ia kane ka surok namar ka long kaba don kam na ka bynta ki paidbah ka tei ka thain.
U Bah Sohlang president ka HANC u la pynkynmaw ba ki paidbah ka thain kila kyntait ban ia shim bynta ha ka MDC election jong u snem 2014 kum ka dak jong ka jingpyrshah ia ka jingshah ieh bein jong kane ka surok kaba ai ia ka jingshakri ia ki paidbah katei ka thain kiba don da kun phew tylli ki shnong ki thaw, la ong u bah Sohlang.
