Shillong, Iaiong 04: Mynta ka sngi ka 4th April, 2017 U Nongaibuit ba Rangbah ka Sorkar Jylla u ba dei ruh u MLA ka thain u la leit ban jngoh ia ki katto katne ki Shnong hapoh ka Constituency ki ba la shah pynjulor ha ki bor ka mariang ha kane ka taiew ki ba kynthup ia ka Shnong Pahamsyiem, Pahamlapong, Nongpoh, Mawdiangum ki ba la kot ka jingjot ki tnum iing sha ka san spah tam ei ei.
Nalor katei ka shnong u la leit ruh ban jngoh ia ka Shnong Umtham, Sarikhushi bad Borgang ka ba la kot ka jingjulor sha ka Lai spah tam ei ei ki tnum iing ha baroh lai Shnong, ha kane ka jingiakynduhlang la ia don ryngkat ki Ophisar Sorkar Kynthup naduh u Project Director ka DRDA u Bah Kharsati, u BDO ka Umling C&RD Block bah R.Kharbihkhiew, u MLA ka Umsning Constituency u Dr.C.Lyngdoh, ki riew rangbah ki ba kynthup ia u Bah Min Makri, Chairman ka Umling C&RD Block, Bah Mayral Born Syiem, Political Secretary jong u Dr.D.D.Lapang, Bah Plielad Tiewsoh, Bah B.S.Teron, Bah Augustine Wahlang, U Sardar ka Nongpoh, Ki Rangbah Shnong, ki riew Rangbah, ki longkmie bad ki samla.
La ioh jingkren na ki katto katne ki long iing ki ba la mad ia kane ka jingjia ki ba la iathuh kumba ia kaei kaba ki la mad, la ioh jingkren na ki rangbah Shnong bad ki riew rangbah, la ioh jingkren na U Dr.C.Lyngdoh, MLA u ba la ai ka jingsngewlem sha baroh ki long iing ki ba mad ia ka jingjulor bad shah ktah ha ki bor mariang.
Ha ba ai jingkren ha kane ka sngi u Dr.D.D.Lapang, u la ai khublei ia baroh ki Rangbah Shnong ki ba la shimkhia ban iatreilang bad ki paitbah nongshong Shnong ki ba mad ia kane ka jingjia lem bad ki Ophisar, u la ai khublei ruh ia u Project Diretor bad BDO ki ba la shim khia ban pynkloi katba lah ban pynioh jingiarap ia kine ki lanot bad ha kum kane ka por u la ai ki kyntien sngewlem sha baroh ki ba mad ia kiane ka jingjia ryngkat ki kyntien ai mynsiem ba kin nym duh jingkyrmen, ha ka ba na ka liang jong u, u la ong ba un pyrshang katba lah ban pynsted ia ki jingiarap da ka jing iatreilang bad ki Ophisar sorkar.
