Shillong, Lber 28: U Nongmih khmat ka Ri France sha India ia ba u la tip kum u French Consul General, u Didier Talpain, bad ka ka Anjita Roy Chowdhury, ha ka jingwan iuh kjat kaba lai sngi sha Shillong kiba dei na ka French Embassy, Kolkata, ki la leit ruh ban iuh kjat ban rung sha ka Law Lyngdoh Mawphlang Law Kyntang, ka Hima Mawphlang.
Ha kane ka jingleit jngoh ia katei ka Lawkyntang la don lang ki nongtrei kiba ka ophis jong ka Ri France kaba don ha Kolkatta ha kane ka jignleit la synran lang da u bah C Alan Lyngdoh u Lyngdoh Mawphlang, Hima Mawphlang, u Bah John F Kharshiing, Chairman, The Grand Council of Chiefs of Meghalaya, bad Adviser & Spokesperson, Federation of Khasi States.
Ha kane ka sngi la don long u bah S Sohliya, bad u Bah H Kharhunai, baroh ar ki Myntri Hima Mawphlang, bad ha ka jingsynran jong u nongialam nongsynran uba la ai ka jingbatai kaba bniah halor ki dieng ki siej ki kynbat kiba don hapoh kane ka law kyntang kaba pawnam bad kaba palat 76 Hectare ka jingheh.
Une u heh u French Consul General ha kaba iaid shapoh ka law kyntang u la ioh ruh ka jingbatai na u Lyngdoh Hima Mawphlang uba la batai bniah halor ka rukom synshar Khadar bad ka bishar hapoh ka Hima Mawphlang bad u la pynshai ia utei u longheh ba ka jing pyndep ia ka niam ka rukom hapoh khlaw ka long kaba la sangeh naduh ki snem antad ki snem 1960 ter ter hynrei u ong ba mynta ka don ka jingleh niam ha jrong lum ha syndah kane ka law kyntang.
U French Consul General u la Kylli la ka don ne em ka jingthoh bniah halor ki Riti Ki Dustur shuh shuh haba ia kren ia iaid na ka liang u Bah John F Kharshiing, Adviser & Spokesperson, Federation of Khasi States u la pyntip ia u French Consul General ba katkum ka jingdon jingtip ki don kumba palat 75 tylli ki law kyntang hapoh jylla Meghalaya hapoh ka jingkhmih jong ki Syiem, Lyngdoh, Dolloi, A’king Nokma, bad ki Kur Khasi, Jaintia bad Garo riewlum.
Ha shwa ba un leit phai U Lyngdoh Hima Mawphlang, u la ai ka jingai sngewbha ha u French Consul General. Na ka liang u Bah John F Kharshiing, Adviser & Spokesperson, Federation of Khasi States, u la ai ka copy jong ki jingthoh kiba la paw ha ka kot ka Ri India ka White Paper on India States.
Kaba kynthup ia ka dulir ki jingiateh bad ki jingkular (Instrument of Accession bad ka Annexed Agreement) kaba 17 August 1948, kaba kdew ruh ia ka tarik ba ia soi ki Arphewsan (25) Khasi States bad ka tarik ba pdiang u Governor General of India ha ka 17 August 1948.
Ha kaba batai ia ka jingdon bun ki Hima, Elaka hapoh Khasi Jaintia bad Garo haba pynshai sha u French Consul General u la Kylli kaei ka jinglong jong ki Hima Elaka ki bym shym paw hapoh ka list Khasi States pynshai na ka liang u Chairman, The Grand Council of Chiefs of Meghalaya, John F Kharshiing, u la pyntip ha u French Consul General ba ki Khlieh Nongsynshar baroh ha ka rynsan ka Federation of Khasi States.
Na ka liang jong ka Grand Council of Chiefs of Meghalaya ki la iai thoh dorkhast sha ka sorkar naduh u snem 1950 bad ki iai ap ia ka jingpyntrei ka Government of India.ia ki dulir jingiateh bad ki jingkular hapoh ka Constitution Ri India mynta la bun bun snem.
U French Consul General u la sngew shon mynsiem halor ka jingdon kine ki rukom synshar kiba don ka jingshaniah jong u paidbah bad u khlem poi pyrkhat ba kin dang don ha kane ka bynta ka Ri India. U French Consul General u la leit iuh kjat ruh ha ka iing Khasi kaba la rim bad kaba la palat 90 snem kaba don ha jan ka law kyntang ka law Lyngdoh.
