Shillong, Naitung 22: Ki Rangbah Shnong jong ka thain Umsning bad ryngkat jong ka Mawhati hapoh jong ka lama Umtrew River Protection Committee (URPC) ha ryngkat bad ki paidbah nongshong shnong hadien ka jingbym lah shah shuh ia ka jingpyntuid jaboh jong ka Kompany Ri syiar ha Mawthei bad Khyndai mer sha ka tyllong umbam umdih mynta ka sngi kila leit ban khang tala shi syndon ia katei kompany.
Ia katei ka jingleit ban khang tala ia katei ka kompany ri syiar kaba la tip kum ka Meghalaya Agrovet Private Ltd la ia wan ban ia donlang bad ar ngut ki MDC kiba kynthup ia u Bah James Sylliang uba dei na Mawhati bad u Bah Don Sumer uba dei jong ka Umsning bad kumjuh ruh ka Magistrate lem bad ki pulit.
Hynne ka sngi na ka liang jong ki paidbah nong shong kiba la shah ktah ha kaba iadei bad ka umbam umdih kumba hynriew spah ngut kila mih na la ki iing ki sem ban kyrshan tylli ia ka rai jong ka URPC ban khang tala noh beit ia katei ka company kaba la pyn jaboh ia ka tyllong umbam umdih.
Haba ki paidbah, ki Rangbah Shnong bad kumjuh ruh ki MDC kila lap da la ki jong ki khmat ba katei ka company kaba don ha Mawthei bad Khyndai mer ia ki jaboh ne ki eit syiar kiba ju pyntuid barabor sha ka tyllong jong ka Wah Umtrew kila tap noh da ki khyndew tang ban da rapjot ia kaei kaba kila leh.
Ha ka jingia kynduh jong u Bah James Sylliang bad ka Coordinator jong ka Meghalaya Agrovet Private Ltd ka kong Bernadine Mawkhiew kala kubur ba na ka liang jong ka Company kala leh bakla bad na ka liang jong ka Kong Mawkhiew kala pan por ruh na ka bynta ban pyndep iaki plan bapher bapher bad ruh ban ym pyntuid shuh ia ki jaboh sha wah.
“Nga ruh nga kubur ba na ka liang jong ka Company ka leh bakla bad nga panmap na ki paidbah nongshong shnong baroh kawei” la ong ka Kong Mawkhiew bad kala bynrap ruh ba na ka liang jong ka company ka pdiang ia ka rai jong u paidbah ban khang shwa mynta ia ka company kat haduh bym pat dep ia ki jaka ban buh ia ki sboh ne ki jakhlia ba mih na katei.
Na ka liang jong ki paidbah kiba la satsia halor ka jingleh khlem akor jong kane ka company da kawei ka sur kila ia pyrta beit ba dei ban khang tala noh beit shi syndon namar ka jingbym niewkor jong kane ka company na ka bynta jong ki paidbah nongshong shnong.
Ha kaba iadei bad kane ka jingleh torti jong kane ka company la ia kren ruh ha ka iing dorbar jong ka KHADC ha kine ki khyndiat ba la dep ha kaba ia kane ka mat la wanrah da u Bah James sylliang bad na ka liang jong ka iing hi baroh kawei kala rai ban phah ia ka kynhun ban tohkit ha kaba iadei bad kane.
Na ka liang jong u MDC jong ka Mawhati u Bah James Sylliang haba kren ha ki lad pathai khubor u la ong kumba ki paidbah jong ka Mawhati kila pynkup bor ha nga na ka bynta ban trei bad ruh peit ia ka jingeh jong ki paidbah mynta kala dei sa ka kamram ka jong nga na ka bynta bad peit ia kaei kaba ki paidbah ki kynduh jingeh.
Ha kaba nyngkong hadien ba ki paidbah kila wan ban pyntip sha nga ha kaba iadei bad kane ka jingeh kaba ktah shisha khamtam eh ha kaba iadei ia dei bad ka umbam umdih ngam lah ban shu shong kli kti bad peitkai ia ka jingeh jong ki paidbah la ong u Bah James.
Ha kaba nyngkongeh nga la rah ia kane ka mat ha ka iing dorbar jong ka KHADC bad la iakren bad sani bha halor ka jingleh torti jong kane ka company ha kaba iadei bad ka jingpyntuid iaki jaboh ha ka tyllong um ba ki paidbah kiju pyndonkam man ka sngi bad na ka liang jong ka council kala rai ban phah ia ka kynhun tohkit halor ka jingleh torti jong kane ka company la ong u Bah James.
“Na ka liang jong ka council kala dep ban phah ia ka kynhun tohkit bad haduh mynta ngam pat ioh ia ka kaiphot bad ngam banse ban mih sha u paidbah namar ba lyngba jong kane ka jingeh ki shnong ki don da ki phew tylli hynrei ki nongshong shnong pat ki don da ki phew hajar ngut kiba shah ktah lyngba ka jingleh khlem akor jong kane ka company” la ong u Bah James Sylliang.
Shuh shuh na ka liang jong u Bah James u la ong ruh kaba khamtieng eh ha kaba iadei bad kane tyllong um ka long ia ka Hospital kaba don ha Umsning namar ba ki tan um na katei kajuh hi ka tyllong um bad kala don ruh ka por ba hadien ba kila ioh ia ka jingthoh na u SDO jong ka PHE Umsning na ka liang jong ki bor pyniaid ka Hospital ia ki nongpang kala phah noh sha nongbah Shillong khnang ban lait na ka jingma bad jingmynsaw ia ki briew khamtam lei lei ia kito kiba thiah pang.
“Kane ka company kam dei shun ban don hangne namar ba lada ka dang don kan dang ktah kham jur ia ki paidbah nongshong shnong namar ba kane ka company kan ym lah shuh ban wanrah biang ia ka jingkhuid jingsuba ia ki Wah ba kynthup ia ka wan Umtrew bad ka Wah Umsiang” la ong u Bah James.
Shuh shuh na ka liang jong u Bah James u la ong ba shippah na ka shispah kane ka company kan ym lah shuh ban wanrah ia ka jingkhuid jingsuba ia kine ki ar tylli ki wah bad u la bynrap ruh ba “ha kaba iadei bad kane ka company na ka liang jong ka council kala dei ban pynduh pyndam noh shi syndon ia ka lisence jong kane ka company khnang ba kan ym ioh shuh ban bteng ia kane ka kam”.
Katkum ka jinglap jingshem mynta ka sngi ka long kaei kaei ka jingma kaba lah ban wanrah ia ki paidbah namar ba tang wat ka jingsma ruh ka long shab palat bad ym lah hi ruh ban shah katno tam lei ia kito ki paidbah kiba pyndonkam ban dih bam bam ia katei ka umkaba tuid na kine ki jaka.(SP News)
