Shillong, Naiwieng 11: U mytri ka tnad PWD u Martin M Danggo u la lum ia ka jingialang jong ki ophisar ha Hotel Polo Orchid Tura ban ia kren ha kaba ia dei bad ki kam surok ha Garo Hills rynat ba dki heh jong ka tnad shna surok ban sngewthuh ia ka jingeh kaba ki ia kynthduh.
Ia kane ka jingialang la pynlong ha ka sngi Balang ha Tura, ha kane ka jingialang na ka liang jong ki heh jong ka tnad PWD ruh kila pynpaw ia la ki jong ki jingeh ha kaba ia dei bad ka jingpyntrei ia ki surok ha ki Lum Garo bad ha ka juh ka por la iakren ruh ba kumno ban wad ki lad ki lynti ban weng ia kine ki jingeh.
Ha kane ka jingiakynduh bad ki ophisar jong ka tnad shna surok ha kaba la long ha Tura na kaliang jong u myntri ka tnad shna surok u la pynsngew bana ka liang jong ka department ka kwah ban iohi ba ia ki jingtrei kibala dep ban ai jingmunjur dei ban sdang noh lane dei ban pyndep noh.
Ha ka juh ka por u myntri ka tnad shna surok u la ong ba na ka liang jong ka department kan wad kilad ki lynti kumno ban weng ia ki jingeh kaba ki nongtrei jong kane ka tnad sorkar kiba don ha Garo Hills ki ia kynduh.
