Nongpoh, iaiong 07: Ka Hynñiewtrep National Youth Front (HNYF),Nongpoh Circle, ka maham tyngeh ia baroh ki party ba kim bit ban pynbiej ia ki paidbah da ka kyiad ne da ka pisa, ban leit thep vote
sha ki Polling Booth bapher bapher jong ka them Ri-Bhoi, ha ka 9 tarik mynta u bnai na ka bynta ban jied ia u nongmihkhmat sha ka Lok Sabha.
U Bah Marcus Marten haba kren sha ki lad pathai khubor, u la ong ba ka seng ka maham tyngeh ia kiba kum kine ki polotishan ba lada lap ka seng kam banse ban leh da kaba tyngeh bad ban thad madan
syndon.
U la ong ruh ba baroh ki dukan kyiad, ki wine store ha ka distrik ki dei ban khang khyrdep naduh kane ka tarik haduh ka 9 tarik mynta u bnai, khnang ban wanrah ia ka jingjied ia ki MP kaba khuid bad suba.(SP News)
