Shillong, Kyllalyngkot 16: U Chief Secretary jong ka jylla Meghalaya u T Tshering mynta ka sngi u la pynlait paidbah ia ka kot jong ka NABARD kaba la mang ban airam sha ka jylla Meghalaya T.1936.37 klur sha ka jylla Meghalaya na ka bynta u snem mang tyngka 2019-2020. Kane kadei kaba la mang ban pyniaid lyngba ki bank ia ka jingairam sha ki kam na ka bynta ki paidbah.
Kane ka jingpynkhreh ka long ha dien ba la shim ia ka jingkhein kaba bniah naduh ki District ha kaba ia dei bad ki kam pynroi namar ka NABARD ka don ka jingiatreilang kaba jan bha bad kasorkar kum juh bad ki seng treimon sngewbha bad ki kynhun jong ki nongrep.
Kane ka jingmang pisa na ka bynta ka jingairam sha ki paidbah kane ka jylla da T.1936.37 klur na ka bynta u snem mang tyngka 2019-2020 kan long ka jingmyntoi kaba khraw namar ka jingairam sah kane ka jylla ka long kaba duna haduh katta katta bad ka jingairam ka long tang hapdeng 30% bad 32% kaba long kaba duna bha ha ka rukom airam.
Haba phiah ia katei ka pisa bala mang ban ai ram na ka bynta u snem 2019-2020 ka long ba na ka bynta ki marrep kiba shipor tang da ki bnai kan long T.387.93 klur, na ka bynta ki kam rep kan long T.714.93 klur na ka bynta ka MSME kan long T.238.41 klur bad kiwei kiba don kam kum ka jingshna iing sha ki nongkyndong bad ka ram na ka bynta ban phah pule.
U Sampath Kumar Secretary ba dei peit ia ka rep ka riang jong ka jylla u la batai ia kaei kaba ka sorkar ka don ban leh ha ka rep ka riang bad u la batai ia kaei kaba ka sorkar ka kwah ban leh ban kyntiew ia ka ioh ka kot jong ki nongrep kiba la don mynta,
U Y.K.Rao, u ophisar ba dei peit ia ka NABARD ba dei jong ka jylla Meghalaya u la ong ba kane kan long ka jingiarap kaba khraw ia ka jylla Meghalaya ha kaba pynkiew ia ka jingiaram sha ki paidbah jong ka jylla Meghalaya lyngba ki bank.
