Shillong, Iaiong 01: Hadien shisngi ba ki nonghikai ki la pynpaw ia ka jingbym ioh tulop jong ki ha u bnai Rymphang, myn hynnin ka sngi nyngkong ka sorkar lyngba ka Directorate of School Education and Literacy (DSEL) kala sei ia ka pisa kaba dei ka tulop jong ki nonghikai jong utei u bnai kiba hap ha ka East Khasi Hills.
La pyllait ruh ia ka DA (Dearness Allowances) kaba sah teng 62 percent bad 70 percent sha ki baroh ki nonghikai skul kynthup ki nonghikai deficit. “La pynlait hynnin ka sngi na ka ophis u Director bad ka pisa ka la poi mynta ha ka ophis u DSEO East Khasi Hills”, la ong u Publicity Secretary ka JACATAM Babu Kular Khongjirem
Kumba 70 ngut eiei ki nonghikai ba la shong thait na ki skul bapher bapher la katto katne snem mynta kim pat ioh satia ia ka Death Cum Retirement Gratuity (DCRG) kiba hap tang ha East Khasi Hills. “Ka pisa na ka bynta jong ki ka la kot sha ka T.1, 71, 20,417 katkum ka jingtip ba la ioh na ophis u director ka DSEL”, la ong biang u Babu Khongjirem.
Katkum ka jingiathuh u Publicity ka JACATAM, ia ka release order (RO)sha ki skul bapher bapher la khmih lynti ba yn sa pynlait ha kane ka taiew ban wan na ka ophis u DSEO, East Khasi Hills, Shillong.
Ha kawei ka liang la iathuh ba ka Re-appropation (RA) kam dei na bynta ka tulop hynrei ka dei na ka bynta ka DCRG. Ka jingthmu ka DSEL ka long ban wad ia ka pisa ban siew ia ka DCRG jong ki nonghikai lyngba ka Re-appropration, ym dei ba ki pynphai shawei.(SP News)
