Shillong, Iaiong 14: U Chief Secretary ka jylla u bah DP Wahlang la ong ba ha baroh kawei ka sor Shillong la ai bor ha ka Shillong Muncipal Board ba kan da dain kuna ia kiba bret pathar ia ki niut ki nier bad ha kine ki shiphew sngi naduh bala ai bor la dain kuno haduh T.3 lak tyngka.
U Chief Secretary u la ong ba ka jingiakren ka long ia kito ki jaka kiba hap sha bar jong ka Shillong Municipal kumno yn leh, haba ia dei bad kane la shim ia ki ar tylli ki rai, kaba nyngkong ka long ba ka tnad ba dei peit ia ka jingleh khuid sha bar jong ka Muncipat dei ka tnad sam um.
La batai ba ka tnad sam um ka dei kaba peit ia ka koit ka khiah ki paidbah, kam dei tang ban pynpoi um hynrei ka peit ruh ia ki jingleh khuid sha ki nongkyndong, te ka tand sam um kan leh ia kata bad ka jingialang kaba la long mynta ka sngi la pyni sha kirangbah shnong ia ka ain na ka District Council kaei kaba ma ki kid ei ban leh.
Katkum ka ain la ai bor ia ki dorbar shnong ba kin dain kuna iano iano la da don kiba bret pathar ia ki jaboh jabain bad ka District Council ka don ia ka bynta kaba khraw ha kane ka bynta namar dei ia kato ka rule jong ka District Council kaba la shna ha u snem 2022.
U Chief Secretary la ong ba ka jingiakren mynta ka sngi ka long tang ia ki lai tylli ki wah, ka Wahumkhrah, ka Umsherpi bad ka Wahumkhen, khamtam ka wah Umkhen ha ki snem ban wan kan kylla long ka tyllong umdih ia ka New Shillong.
Haba ia dei bad ka jingtuid jong ki jaboh sha ka pung Umiam la ong ba ka ktah ia ka pung bad mynta la don kam ban khlong ia ka sboh kaba la long ha katei ka pung bad mynta ki dang wat jaka shano ban bret lada pynkhuid.
