Shillong, Lber 04: Mynta ka sngi u Superintendent ki pulit jong ka Ri Bhoi District u Jagpal Singh Dhanoa u la pyntip ba kila ioh ban bat ia kawei ka trok kaba don ia u number NL 01-AH-5853 ha lat Umsaw Ri Bhoi District ha kaba kila ioh ban kurup haduh 4,746.408 kilo u ganja.
Katkum ka khubor kaba la phah da ki pulit la ong ba kila ioh jingtip ba ka don kawei ka trok kaba don ia u number NL 01-AH-5853 ka kit ia ki jingkit kiba long beain, ha kane ka jingtip na ka liang jong ki pulit kiba don ha lat Umsaw bad ki CRPF kila ap bad haba poi katei ka kali kila bat.
Haba la khynra ia kane ka trok la shem ba ki don ki song kiba la song bha bad haba la plie la shem ba ki don ki Ganja bad ha dien bala pyndep ia baroh ki jingleh katkum ka ain la register ia kane ka ejahar bad ki pulit hapoh ka ain NDPS Act. Baroh ki song kiba don ha kate ka kali ki long 280 tylli.
Ki pulit kila kem ia u Babulal Sheikh 48 snem ka rta, ia kaTrok kaba kit ruh la kurup da ki pulit bad kane ka jingkhynra jong ki pulit ia ki ka long ruh kum shibynta kum ka jingpynkhreh ia ka elekshon sha Lok Sabha ba talasi ia ki kali kiba iaid ba ieng.
