Shillong Nailar 07: Ka Umta Youth Welfare Sports Club bad ka Mawphru Jongngi FC kiba la pynkhreh ban iakhun iaka phainal football ha ka 6 tarik u mynta u bnai kila kynnoh ba kila shah thok ha Ri Bhoi Youth Council (RBYC) Umden Circle bad kine ki kynhun kim shym la ioh ban mih madan hynrei kila shu kut tang ha ka jingshah pynap kai ha ki nongpyniaid ki bym shym la wan mih satia sha ka madan ban pynialehkai kumba la khot ia ki.
Na ka liang jong kine ki ar tylli ki kynhun kiba la poi sha ka phainal, kila pynpaw iaka jinglyngoh ba ki nongpyniaid kim shym la wan mih ha madan Umden Sports Club and Cultural Association ban pynlong iaka phainal kumba la pynbeit.
Ki nongialam ka Umta Youth Welfare Sports Club bad iaka Mawphru Jongngi FC kila pyrshang ban phone ia ki nongialam ka RBYC Umden Circle ban iakren sngewthuh jingmut ha ka lynti kaba dei hynrei kim shym la wan mih sha madan ialehkai.
Kila iathuh ruh ba kila dep ban iakhun iaka Semi-Final naduh u bnai Rymphang bad haduh mynta ym pat lah ban pynialehkai iaka Final, bad kine ki artylli ki kynhun kila dawa ba ka RBYC Umden Circle ba kidei ban siew iaka bailut baisep kaba kila pynlut na ka bynta kane ka tournament naduh First Round haduh ka Final kaba la kot T.50,000.
Kila pynpaw ruh ba kim kwah shuh ban ialehkai ia kane ka Final Football kaba la pyniaid da ka RBYC Umden Circle, kane ka long katkum ka kyrwoh na u Manager Mawphru Jongngi FC bah Odiwiss Nongkseh bad u bah A Ingti jong ka Umta Youth Welfare Sports Club.
