Shillong, Jyll
iew 22: Ka Executive Committee jong u Bah Pynshngainlang Syiem ha Khasi Hills Autonomous District Council (KHADC) mynta ka sngi ka la neh, haba ka kong Telinia Thangkhiew na ka HSPDP kala wanrah ia ka motion bym don jingshaniah shuh ia ka EC, hynrei ki liang pyrshah kila mih noh shabar na ka iing dorbar khlem da iaten jubor mano ba bun paid .
Hadien ka por jingkylli u Chairman u bah LG Nongsiej ula bthah ia ka kong Thankhiew kaba la wanrah ia ka motion bym don jingshaniah shuh ia ka EC ba kan iaid noh shakhmat bad ka motion, kumta kane ka MDC jong ka seng HSPDP kala rah ia ka motion bym don jingshaniah shuh, hadien ba la dep rah u Chairman ula bthah ba kan sdang noh ia ka jingiatainia hynrei ka la kyntiat .
Hynrei ka kong Telinia Thangkhiew kala kdew ia ki kyndon jong ka AD Rule kaba 71, kaba kren shai ba ia ka motion hadien ba la wanrah hapoh iing dorbar lah ban shim hapoh ka 24 kynta lane shwa ka 2 sngi. Ka la ong ba ia ka motion bym don jingshaniah shuh ka dang wanrah mynta ka sngi ha ka jingshisha la dei ban shim lashai ka sngi hadien ba la dep pyllait ia ka mang tyngka .
Hynrei u Chairman u bah Nongsiej, da kaba kdew ia katei ka juh ka rule ula ong ba ka don ka jingdonkam kyrkieh bad kata ka jingdonkam kyrkieh ka long ban pynshisha la ka Executive Committee ka dang don ne em ia ka jingbun paid khnang ban iashai ha kaba pyllait ia ka mang tyngka . Lada ka EC kam don shuh ia ka jingbun paid ka long ba ka EC ba thymmai kan pyllait ia ka mang tyngka .
Ka long kaba donkam kyrkieh ba ka iing dorbar kan ia kren noh ia kane ka motion bym don jingshaniah shuh ia ka EC. Hynrei ki liang pyrshah kila mih noh na ka iing dorbar khlem da iatynjuh bor da kaba ai daw ba ki pyrshah ia u Chairman ka iing dorbar.
Haba ki liang pyrshah ki la mih noh na ka iing dorbar khlem da iatynjuh bor, la shim ba ki la weng noh ia ka motion bym don jingshaniah shuh ia ka EC ba la ialam da u bah PN Syiem . Da ka jingmih noh jong ki liang pyrshah na iing dorbar kala pynlong ba ka EC u bah Pynshngain kala neh kala neh khlem da don ka jingiatynjuh bor hapoh iing dorbar.
Hadien ba ki liang pyrshah ki la mih shabar u Chairman ula pyniaid ia ka iing dorbar ia ki mat jingiakren kiba dang sah. Ha kane ka sngi ka iing dorbar kala pyllait ia ka mang tyngka jong ka KHADC khlem da don kano kano ka jingiatai nia. Ka mang tyngka mynta u snem 2017-2018 ka long T. 201,59,38,220/- klur tyngka.
