Shillong, Rymphang 09: Ka seng samla pule jong ka Ri Bhoi Student’s Union (RBSU) mynta ka sngi kala ia kynduh ia u myntri rangbah ka jylla u Dr Mukul Sangma bad ai ha u ia ka dorkhas ban dawa na ka sorkar ba dei ban buh ia kawei ka Government College hapoh ki thian Umroi na ka bynta ka jingmyntoi jong ki briew kane ka thain.
Ia kane ka kynhun RBSU la lam khmat da u president ka seng u Bah Everjoy Nongpluh bad u General Secetary u Bah Donbok Syiem lem bad kiwei ki dkhot jong ka seng, na ka liang jong ka sorkar nalor u myntri rangbah la don sa ki ophisar jong ka tnad pule puthi jong ka sorkar jylla.
Haba kren ha ki lat pathai khubor ha dien ba la kut ka jingiakren bad ki dkhot jong ka RBSU, u myntri rangbah ka jylla ym shym la kren shai la ka sorkar kan pdiang ne kyntait ia katei ka jingdawa jong ka seng samla pule na Ri Bhoi District, hynrei u myntri rangbah u la ong “ Nga kyrmen kin leit phai da ka jingkyrmen, namar ngin sa ia kynduh biang ha dien ka dorbar mang tyngka ha u bnai Lber”.
U myntri rangbah u la ong ha kane ka jingiakren u la ioh sngew ia kaei kaba ka seng RBSU ka dawa na ka sorkar, ha ka juh ka por na ka liang jong ka sorkar ruh ka ialeh katba lah ban pynbiang ia ki jingdon kam jong ki paidbah khamtam eh ha ka liang jong ka social Sector bad ia kaei kaba ka sorkar ka thmu ynsa wanrah ha ka dorbar mang tyngka kaban sa long ha u bnai ban wan.
Ka RBSU ha ka dorkhas kaba kala ai sha u myntri rangbah ka jylla ka la dawa ba dei ban buh ia ka Government College ha Umroi, namar kane ka jaka ka long pdeng ia ki lai tylli ki Constituency, ka Umsing, Mawhati bad Umroi Constituency bad kat nangmih ki sngi ka jingbun ki samla pule na kane ka thain kala nangkiew.
Kum ka seng kala sngewdei ban dawa na ka sorkar ba kan buh noh ia kane ka Government College ha kane ka jaka bad kane ka jingdawa jong ka seng kam dei shuh kaba dang thymmai hynrei ka de kaba la iai dawa na ka por sha ka por.
