Shillong, Naiwieng 21: U Bah Goodleaderson Nongsiej ha dien ba u la shah jied kum u Chairman jong ka iing dorbar KHADC u la ong ba haduh mynta ym pat ioh da ka jingthoh ba la beh seng na ka seng HSPDP kaba la pynjop ia u ha kine ki ar sien ki MDC election.
Ban ia kren ia ka jingshisha u dang dei hi u dkhot jong ka HSPDP, hynrei u la hap ban leit kyrshan ia ka PDF ka EC kaba la ialam da u Bah PN Syiem halor ki nongrim ba u CEM u ieng rangbah haduh kineki sngi, ha duh mynta hi u dang shim ba u dei u dkhot jong ka seng HSPDP namar ba u khlem pat ioh da ka jingthoh.
U Bah LG Nongsiej u la ai khublei kyrpang ia ki paidbah jong ka Nongstoin konstitwensi kiba la jied ia u ban long u MDC jong ki bad ka jingpoi ka jong u sha kane ka kam Chairman hapoh jong ka KHADC ka burom ka leit sha ki paidbah jong ka Constituency u la ong.
Kumba ka paw na ki dak ki shin ka pyni ba ka seng HSPFP hapoh jong ka iing dorbar KHADC kan sa dang paid shuh shuh namar ha kane ka sngi jied ia u Chairman na ki ar ngut ki MDC jong ka HSPDP kiba la poi sha ka iing dorbar dei tang u bah Pyniaid Sing Syiem, katba ka kong Telinia Thangkhiew kam shym la poi sha kane ka dorbar ba kyrpang.
