Shillong, Lber 07: U myntri rangbah ka jylla u Conrad K Sangma, ka myntri ka tnad ka koit ka khiah ka Dr. Mazel Ampareen Lyngdoh ha ka jingdon lang u myntri ka tnad sam um ka jylla u Marcuise N Marak, kila sam ia ki shithi thungkam sha ki 83 ngut ki doktor kiba dang shu pyndep ia ka jingpule jong ki. 55 ngut ki dei ki Doctor Specialist, 20 ngut dei kiba la pyndep ia ka jingpule Doctor MBBS bad 8 ngut ki Doctor bniat.
Ha ka jingkren u myntri rangbah ka jylla u la ai khublei ia kine ki doctor kiba la rung kam ban trei bad ka sorkar, la ong ba ki dei ban sngewthuh ia kaei ka kam kaba ki trei na ka bynta ban ia ka jingshakri ia ki paidbah bad kin trei da ka jingkhmih lynti ba kin iarap ban ai ka jingkoit jingkhiah ia kiba pang ba shitom.
La ong ba shen ka sorkar kan sap lie paidbah ia ka jingbuh jingtip kaba thymmai na ka bynta ka tnad kakoit ka khiah ka jylla, ia kaba la tip kum ka “Patient Management System” kane ka long ban buh jigntip ia ki jaid jingpang baroh bad ban sngewthuh kumno ban tip ha kino kipor bad ka jingpang kaba kumno kan kham kynrei katkum ki bnia.
Da kaba don ia kane kan iarap ia ka sorkar ban pynbiang ia ki dawai bad ha ka juh ka por ba sngewthuh ka jingpang kaba kumno kan kham kynrei ha kino ki bnia bad kan long ruh ka jingtip ia ki doktor ban sumar ia kiba pang shitom, yn leh ia kane da kaba pyndon kam ia ki kot ki bor kiba katkum kane ka juk kaba mynta.
La ong ka long ka sien kaba nyngkong ha ka kylla Meghalaya bad na pdeng ki jylla baroh ha ka Ri india kaba ia ka jingmang pisa na ka bynta ka tnad ka koit ka khiah kabala kiew sha ka 80% na ka jingmang tyngka. Ba ha kine ki snem ka sorkar kan shna ia ki jaka sah jong ki doktor baroh sha ki nongkyndong ne ban pynbha ia kiba la don.
Ha ki District ka sorkar kan shna ia ki iing sah sorkar ha kaba baroh ki nongtrei sorkar kin ioh ban sah ha ka juh ka jaka kiba dei na ki tnad sorkar bapher bapher ruh kam leilei bad kin ioh ban ia ithuh wei ia iwei, kane ka long ha ki jaka jong ki District.
Ha ka jingkren jong ka myntri ka tnad ka koit ka khiah ka Dr. Ampareen Lyngdoh kala ong ba ka jylla ka don hapdeng ka jingduna doctor bad na ka liang jong ka bad ka tnad ka koit ka khiah kin sa ia kren bad umyntri rangbah ka jylla ban thied shuh ia ki seat ban pule doctor ha ka kyrdan ban pyntbit kyrpang.
