Shillong, Iaiong 12: U Symbud Myntri Rangbah ka jylla u bah Prestone Tynsong, mynta ka sngi u la lum ia ka jingialang bad ki heh sorkar na ka bynta ban pynkhreh ia ka jingthmu ban pynlong ia ka jingialang jong ka G20 ka ban long ha ka nongbah Shillong.
U ba Preston Tynsong u la ong “Ngi la don ka jingialang bad baroh ki tnad sorkar bad nga dap da ka jingsngewtynnad ba ngi la lah long ki ba kloi ban pynlong ia ka jingialang jong ka G20 ha ka nongbah Shillong ha ka 15 bad 17 tarik mynta u bnai” shuh shuh u la ong”.
“Ngam lah ban iathuh lut ia ki jingpynkhreh jong ka sorkar jylla namar ki don bun, la ka dei ka jingpynitynnad, ka jingmaramot, ka jingpynbiang ia ki lad jingiada, ka jingpynkhreh ia ki kali. Ngi la iatai sani bha ia baroh ki jongdonkam bad mynta ngi la long kiba la pynkhreh ban pdiangsngewbha bad ban pynlong ia ka jingialang jong ka G20 kaba seisoh”
U bah Preston Tynsong haba iakren bad ki nongthoh khubor u la iathuh ba ha katei ka jingialang kin don 120 ngut ki heh ki ban wan iashimbynta ha ka jingialang na ki kylleng ki Ri kiba don hapoh jongka kynhun G20 ha kaba la pynkhreh ia ka jaka sah ka jongki hapoh Marriott Hotel bad ia ka jingialang ruh yn pynlong hi ha katei kajuh hi ka jaka.
U Bah Prestone ula ong, ba la dep ban iakren sani bad bthah ruh ia ki tnad kiba dei peit kumjuh ia u Deputy Commissioner, ka tnad Pulit bad ia u SP Traffic ban pynkhreh ia ki jingtip bad ban ai ia ka jingbthah kaba shai kdar ia ki surok kaba ki VVIP ne ki heh ki hain, kin leit kin wan.
Ha kaba ia dei bad ka shongsuk shongsaiñ, u Bah Prestone ula pynthikna ba ka jinglong jingman ha ka jylla ka long kaba biang bha bad kitei ki heh ki hain ki ban wan poi ha Shillong kin sngewkmen bad kan long ruh ka burom ia ka jylla Meghalaya.
