SHILLONG,Iaïong 23: Mynta ka sngi ki paidbah Lumrit, kiba hap ha ka Raid Tynring, Ri-Bhoi District,ki la leit ban ia kynduh ia ka kong Agnes markhmat bad ki ki la kyntait mardor halor ka jingmih ha ki kotkhubor ba ki donkti ban iasylla lang bad ka kynhun kaba pyrshah ia u Bah C.A Diengdoh, Sordar ka Shnat Raid Tynring ban leit pynpra ia saw tylli ki ingsah ha Wah Swad ha ka 14 tarik mynta u bnai.
Ha kane ka jingleit iakynduh ba markhmat bad i kong Agnes ki la pynpaw ba kum ki paidbah nongshong shnong ka Lumrit naduh kaba sdang ialeh mukotduma, ki don beit sha ka liang jong u Sordar bad kim donkti ei ei bad ka Kynhun ki hynniew shnong kaba pyrshah ia u Sordar. “Kiba donkti bad ka kynhun pyrshah ia u Sordar ki dei tang uwei bad arngut hynrei ym baroh shi shnong,” ong u Bah Lumjingsuk Nongspung, Rangbah Shnong ka Lumrit haba kren ha u nongthoh khubor hynne ka sngi.
Na ka liang ka Kong Agnes ka la pynpaw ba ka jingleit jong ka sha Wah Swad ha katei ka sngi, ka dei namar ka jingsngew synei ia kitei ki saw tylli ki longing kiba la ngat ha ka jingshah pynkhein wat ia ka hok longbriew manbriew
Une u nongialam Shnong, u la ong, “kum ki nongshong shnong, ngi kohnguh beit ia ka jingpyniaid jong u Sordar ka Raid Tynring bad ngim ju kwah hi ruh ia kano kano ka huri hura namar ki paidbah nongshong shnong kim shym la leit iashim bynta ha katei ka dorbar namar ngim kwah ia ka jingialeh thma.’’
U iathuh ruh ba naduh ba la sdang kane ka jingialeh mukotduma, ki paidbah ki shah pynduh wat ia u khaw reshon, ki jingbam na Anganwadi Centre, ki skhim sorkar kiba wan na ka Mawryngkneng Block bad kiwei kiwei ki jingmyntoi ba ki dei ban ioh. “Kiba ioh ia ki skhim sorkar bad kiwei kiwei ki jingmyntoi dei tang kito kiba don ha ka liang kaba pyrshah ia u Sordar,” u la ong, “wat ia ka jingpynrung kyrteng ha ka Electoral Roll, ruh ka la don ka jingpyrshang ban pynduhlad da kaba shu pyntip sop sop, hynrei ngi la ioh ia ka EPIC hadien ba ngi la leit pynshisha ialade hakhmat u Deputy Commisioner lyngba ka Syrnod kaba ngi ioh na u Sordar.”
ka Kong Darihun Kharmalki, iba long ka nongtrei Asha ha katei ka shnong, iba la thung da ki Doktor ka PHC Lumrit i la shah pynduh jubor na ka kam ha kaba kine kiba pyrshah ia u Sordar ki la thung da ka briew lajong.
U iathuh ruh ba u Bah Wanches Diengdoh, u dei tang u Rangbah Kyntoit, bad ym shym la jied hi ruh ia u kum u Rangbah Shnong ka Mawkduk, kumba u la kam ialade ba u dei Rangbah Shnong.
Haba kynthoh halor ka jingdonkti pynshit thma jong ka Kong Christabell Wanniang, une u nongialam shnong, u la kynnoh ba ha ka por ba dang long ka elekshon MDC, ka Kong Christabell ha ka jaka ban wan ialap ia ka roi ka par, ka wan pynban ban pynshit thma. “Ngi sngewsih jur ia ka jingjia ha Wah Swad, ha kaba ki nongthom bor ki la iuhroit ia ka Dorbar, ia u Sordar bad ia u Syiem ban shu thom beit da ka bor ia kiba duk kiba suk,” u la ong.
U Bah Ribok Pyngrope u iathuh ba ka la pur ka hamsaia ba kane ka kynhun pyrshah ia u Sordar ka la rai ban ym shong suk katba ym pat poi ha ka jingiaumsnam.
Kane ka jingiakynad ha ka Raid Tynring, ka la sdang ban pynkharoi wat ia ki jingiabuh ingtyrkhong haba kaba ka don ruh ka jingpyrshang ban iabyrngem byrsit kaba la poi wat shaduh u pud ban iasyndong kti bad ia ap ktem.
U Bah Phemos Kharumnuid, uwei na ki lanot uba la ngat ha kane ka apot, u la iathuh ba ha ka 20 tarik, Nailar, 2013 ha kaba ka la don ruh ka kynhun kaba leit byrngem ia u ha ing bad ym tang katta ki la don ruh wat kiba la shah bom shah tied klep, kiba kynthup ia u Bah Ronik Kharumnuid na Kyrdeng uba la shah mait da u siej haduh ba ka skhor jong u ka la kad, u Bah Thnowell Lawai na Wah Swad uba la shah bom klep ha u snem 2001 bad u Bah Shahniah Pyngrope, na Kyrdeng.(SP News)
