Shillong, Naiwieng 22: Ka KSU South West Khasi Hills District myntaka sngi kala leit ban ia kynduh ia u myntri ka PWD u Martin M Danggo ban ia kren halor ka jingmaramot ia ka surok na Nongstoin sha Wahkaji n aka pisa T.20 klur bala kular da u Bah PN Syiem CEM jong ka KHADC.
Ha kane ka jingiakren na ka liang jong u PWD Minister u la ong ba ia kane ka kam yn sa ia kren biang bad u CEM jong ka KHADC kumno ban leh ia kane ka kam, kane ka long katkum ka jingiathuh jong u president ka KSU SWKHD.
Haba kren ha ki nongthuh khubor ha dien ka jingiakynduh bad u myntri ka tnad shna surok jong ka jylla u Bah Forwardman Nongrem u la ong ba kum ka seng kim ia kren aiu ka PWD bad ka KHADC kin ia leh, hynrei kaba ki kwah ka long ba dei ban maramot noh ia ka surok na Nongstoin sha Wahkaji kumba la kular da u CEM ka KHADC.
Haba ia dei bad ki jingkylli b aka KHADC kala dep mang ia kane ka pisa sha ki para MDC namar ba ka sorkar kam ai NOC na ka liang jong ka KSU SWKH District kala ong ba ia kat kim tip ei ei, ki bat beit ia kaei kaba u CEM jong ka KHADC u la kular ha ka jingialang kaba la long ha KHADC.
Ha ka juh ka por ruh kila kyntu ia u myntri jong ka PWD u ba dei ruh u MLA jong kane ka jaka ba un wad ki lad ki lynti kumno ban plié noh ia ka PHC ha Wahkaji kaba la sah khongrengmynta la bun bun snem. Na ka liang jong u MLA kane ka jaka u la ong ba yn sa leh ia kaba don kam.
