Shillong, Nailur 02: Ka Ranikor Block Congress Committee (RBCC) ka pynrem jur ia ka jing kynnoh jong ka kong Pelcy Snaitang ba u MLA ka thain u Martin M Danggo ba u la leit sha nongbah Delhi ban ia kynduh ia ki nong ialam jong ka party BJP bad ruh ba ban pan ticket na katei ka seng, ka RBCC ka pan jingpynshai kaba shai na ka kong Pelcy ba myno bad iano u MLA jong jong ki u ia kynduh?.
Khnang ba lada ka RBCC ka ioh ia ka jingshisha halor jong kane ka jing kynnoh kan pynshitom katkum ki kyndon jong ka party. Hynrei lada kane ka jingkynnoh ka long kum ka jingphohsniew ruma jong ka kong Pelcy , ka pynpaw ba kam pat long kaba bit ban long candidate ban ialeh election ha kano kano ka Dorbar thaw ain, namar ba ka paw kumba kam shaniah iala de hynrei tang ha ka party.
Ha kaba ia dei bad ka roi ka par ka kong Pelcy ka long kum ka briew ka ba matlah, ka bym pat sngewthuh ia ka jingiar ka Constituency bad ia ki kam ba u MLA u la leh ha kine ki snem kiba la leit noh , kum ban shu pynkynmaw ha kine ki saw term ba u M.M.Danggo u la long u nongmih khmat jong ka Ranikor, u la wanrah ia ka PWD (R) Division, Police Station Ranikor, Police Station Nonghyllam, ki Police Outpost, Administrative Unit.
Ha kaba iadei bad ki kam pynroi kum ki surok, ym lah ban jer lut hangne hynrei tang kiba kham kongsan kum Ranikor- Lailad, Lailad Nongjri, Khatpra-Mohekola, Sarin Nongkenbah, JR Road, Umpung-Ranikor, Jingkieng Mawpud,Lailad- Borsora, Nongmallang, ka jingkieng doi doi ha ka wah kynshi, Rangjadong-Ngunraw, Pynden Umjarain-Mawphanrang, , JR Road-Rangjadong, Mohekola.
Ka surok na Sohylleng, Sohyileng-Amarsang,Rajapara-Nayapara, Nayapara-Koltapara, ki surok shnong ha Rangthong haka jingiaseng Synod, JR Road – Photjaud Rangthong, JR Road- Mawmerang, ki surok shnong ha Ngunraw, MBGM Road – Kolomboit, MBGM lyngba ka Koraikora- GREF Road bd kiwei kiwei ki kam pynroi kum ki MFC Building, Tourist Lodge, BADP IB.
Ha ka ba iadei bad ka jingkynthoh jong ka kong Pelcy ba ka Congress kan jah rngai ha u 2018 dei tang hadien ka election ngin sa pynshisha ia kata, ka Congress ha Ranikor ruh ka long kaba la khreh ban ialeh ia ka election bad kum ka party kan trei shitom ban wanrah biang ia ka jingjop jong ka party.
