Shillong, Nailur 10: KI nonghikai haba jong ka lama Meghalaya Sarva Shishah Abiyan School Teachers Association 4th Teachers (under state plan) haka jingialang kaba la long mynta ka sngi ha Khasi National Dorbar hall, kila shim ia ka rai ban pdiang ia ka jingthmu jong ka sorkar ban rah ia ki nonghikai 4th Teachers na ki skul Upper primary school sha ki Lower primary school.
Haba pdiang ia kane ka jingthmu jong ka sorkar , kane ka seng ka kyrpad ia ka sorkar jylla, haba rah ia ki na ka UP sha ka LP dei ban rah da kaba ai ha ki da ka jingsiew katkum ka deficit pattern, bad dei ban buh ia ki ha ka juh ka Closter Resources Centre (CRC) lane kiba ia jan eh bad ka CRC.
U Chairman jong ka 4th Teachers Association u Bah Hababut Marbaniang, u la ong ha ki lad pathai khubor ba ki skul SSA ha ka jylla baroh kawei kiba don ia ki Fourth Teacher ki don 1521 tylli, kane ka jingeh ka mih mynta ka dei na ka daw jong ka jingleh ka sorkar ha ka por ba thung ia ki ha kaba sdang namar ka dei na ka state plan.
Namar ia kine ki nonghikai kiba hikai ha ki skul SSA ki hap hapoh jong ka state plan, na kabynta ka jingbha jong ki nonghikai la da ka sorkar ka pynkynriah ia ki na ki UP sha ki LP ka sorkar ka dei ban pynkynriah ia ki ha ka kyrdan jong ka deficit pattern,u la ong.
Na ka liang jong ka seng kin sa phah da ka jingthoh sha ka sorkar jylla ha kaba ia dei bad kane ka kam ban pan ia ka jingpynshai na ka sorkar , bad kin dawa na ka sorkar ba kan ai ia ka jingshai halor kane hapoh ka shibnai naduh ka sngi ba kin ai ia ka jingthoh sha ka sorkar jylla.
