Shillong, Naitung 20: Ka Hynniewtrep Youth Council jong ka Mawlai Circle mynta ka sngi kala pdiang burom ia u Dr Mukul Sangma myntri rangbah ka jylla sha ka jingplie ia ka Mawlai Community bad Rural Development Block ha Lumawsiang, Mawtawar da kaba rah ia ki placard ban dawa ba dei ban pyntrei kam ia ka Inner Line Permit ha kane ka jylla.
Ha kane ka sngi ki dkhot jong ka HYC kila ap ha surok shnong Lumawsing, ha lynti ban leit sha ka jaka ba don ka jingialang ban plie ia ka Mawlai C&RD Block, haka por ba u iaid u myntri rangbah ban rung sha ka jaka ba don jingialang ki dkhot jong ka seng HYC kila ia pyrta ki dawa ia ka ILP.
Ha ki jingthoh kaba kila wah ha ki kynroh jong ki dukan shnong na ka liang jong ka HYC kala ong ba ‘Khlem ILP kin Nym shong thait” ki don ki jingthoh kiba la ong “ Pynbeit noh ia ka jingiakajia pud” ki don ki jingthoh kiba ong “Mr Chief Minister khublei shibun ba phi la ai ia ka Mawlai, Block, ngi kwah shuh, ngi kwah ia ki ain jong ka ILP ki ain kiba kham khlian”.
Ha kane ka sngi ki dkhot ka HYC kila rah ruh ia ki placard ha kaba kila buh ki jingkylli, “Ko MLA, MDC katno tylli ki ain phi la thaw ban iada ia ka jaidbynriew”, ka don ruh ka placead kaba la thoh “Ka HYC ka khot sha ka jingiatainia ia ka kynhun myntri ka ban long ha ka 22 tarik mynta u bnai”.
