Shillong, Naitung 27: Mynta mynstep ka party BJP na Delhi kala bthah ia u Myntri Rangbah ka jylla u Conrad K Sangma ban bujli noh ia u bah Alexander Laloo Hek bad u bah Sanbor Shullai ha kane ka kynhun myntri jong ka sorkar MDA bad ka jingpynsmai kan long shibit 4.00 baje nohphai sngi.
Katkum ki lad khubor kiba la ioh kane ka jingbthah kala wan na Delhi ha dien ba u myntri kam poh iing ka Ri India u Amit Shah u la wan sha Shillong ban ia kynduh ia ki nongialam jong ka party ha ki ar sngi kiba u don ha nongbah Shillong.
U Myntri Rangbah ka jylla ha dien bala u la ioh ia kane ka jingpyntip na ka liang jong ka party BJP, u la wengnoh ia u bah Alexander na ka kam myntri bad la buh ban pynsmai ia u bah Sanbor Shullai MLA jong ka 19-Shillong South kum u myntri hapoh ka sorkar.
Ki lad khubor napoh ka BJP ki iathuh ba kane ka jingiakren bad ki nongialam ka party ha Delhi ka dei kaba la slem bad ki nongtrei ka party BJP ha Meghalaya ki kwah ba ki MLA jong ka party kin ia don bynta lem ha ka kynhun myntri namar ki don tang ar ngut ki MLA.
