Shillong, Rymphang 26: U myntri rangbah jong ka jylla u Dr Mukul Sangma ha dien ba u la ioh jingtip ia ka jingjia kaba sngewsih ha kaba bun ki mynsiem briew kila duh ei na ka daw jong ka jingkylla ka trok kaba kit ia ki nongleit jingiaseng, u la phah ia ka khubor sngewlem sha kiba ha iing ha sem jong kito baroh kiba la khlad noh bad kumjuh sha kito kiba dang don ha deng ka jingsumar na ka jingmynsaw.
Ha kane ka khubor sngewlem kaba u myntri rangbah u la phah mynta ka miet u la ong “ Nga dap da ka jingsngewsih kaba khraw ban tip ia kane ka jingjia ba na ka daw jong ka jingkylla kali bun bah ki mynsiem kila duh ei bad kiwei pat kila mynsaw kiba dei ki briew ba ieit ba thoin jong ngi”.
Ha ka juh ka por u myntri rangbah u la ong “katba ki bor sorkar ryngkat bad kiba ha iing ha snem jong katei ka thain ki dang ia wad kilad ki lynti kumno ban iada na ki jingmynsaw, ha ka juh ka por na ka liang jong ki bor sorkar kala bethah ban ai jingiarap sha kito ki long iing long sem kiba la shah ktah ha kane ka jingjia ba sngewsih”.
U myntri rangbah u la ban biang “ sa shisien nga ai phah ia kane ka khubor sngewlem sha kiba ha iing ha sem baroh bad nga duwai ba u blei trai kynrad un ai bor ai mynsiem ha kum kine ki jingjia ba sngewsih ia kaba ym lah shuh ban pyndap ia kane ka jingduh kaba khraw, to u blei un kyrkhu kyrdoh bad un ai ka jingtngen”.
