Shillong, Rymphang 27: U Bah HS Shylla MDC jong ka Nongkrem mynta ka sngi u la phah ia ka ia ka khubor jingsngewlem sha kito kiba ha iing ha sem jong kito ki 17 ngut kiba la duh noh ia la ka jingim tang na ka daw jong uwei u briew u bym don ka mynsiem jingkitkhlieh ia ka jingim jong kiwei pat kiba snoh ha ki kti jong u kum u nongniah ia ka kali.
Ha kane ka khubor sngewlem u Bah Shylla u la ong ba kane ka jingjia kala wan lap na ka daw jong ka jingpynher stet ia ka truck kaba la kit bun ngut ki briew ka dei ka mynsiem runar. Ki bor jong ka ain ki la dei ban pynhap ia kiba kum kine ki briew ha ka jingpynsajia kaba jur namar ki la long ka daw ha kaba 17 ngut kiba angnud ban poi sha ka jingiaseng hynrei ban poi sha ka jingduh ei ia la ka jingim bad ia kiwei pat kiba hap ban mad ia ka ki jingshitom kiba jur.
Ha kane ka jingpynhah sngewlem la ong ba “Tang u Blei jong ka jingsuk Uba lah ban syrpud syrpai ia ki dohnud ba la lwet jong phi baroh kiba ha iing ha sem baroh jong kito kiba la duh noh ia ka jingim bad kumjuh ruh ia kito kiba la mynsaw nga ai khublei bad ka jingsngewnguh kaba khraw ia kito baroh kiba la knew ia ka kti jong ka jingiarap ha kum katei ka por” la ong u Bah H.S.Shylla, MDC
