Khliehriat, Rymphang 09: Ka AJYWO Central Body ka pynpaw iaka jingsngewkhia kaba jur halor ka jingduna palat ki doctor ha Khlierhiat CHC ka jaka sumar ba la attach lang bad ka Hospital 100 bedded ha Khliehriat ia kaba ym pat shym la lah ban plie haduh kine ki sngi da ka sorkar jylla.
Hadien ka jingioh jong ka AJYWO ia ki jingud na ki paidbah halor ka jingduna palat ki doctor ba dei ban ai ia ka jingshakri ia ki paidbah ha katei ka jaka sumar kaba la buh ia ki ha ka jingeh kaba khraw, ka AJYWO Central Body hapoh ka jingialam u Bah M H Dkhar, President jong ka seng ha ryngkat u Bah WS Suting President jong ka AJYWO East Jaintia Zone, ka seng ka la leit ia kynduh ia I Acting DM & HO jong ka East Jaintia Hills District bad iakren bad I halor ka jingeh kaba ki paidbah ki ia kynduh ha katei ka jaka ai jingsumar ia ki paidbah ha khliehriat.
Ha ka jingiakren ka seng bad u Acting DM & HO jong katei ka District ka seng ka la lap shibun ki jingdkoh trei kam jong katei ka jaka sumar ha kaba ai ia ki jingshakri ia ki paidbah na ka daw jong ka jingbym biang ki doctor kat kum ki post ba sanction na ka bynta jong ka bad kaba kham eh shuh shuh ka long ba ia katei ka CHC la attach lang bad ka Hospital 100 Bedded ka ba la dep tei hynrei ia kaba ym pat shym la lah ban plie bad pyntrei kam pura haduh mynta ki sngi.
U Bah M.H Dkhar President jong ka AJYWO, u la ong, “Kat kum ba ka long mynta, katei ka jaka ai jingsumar hapoh ka district, ka don tang u wei u doctor mynta la ar taiew ei ei bad kane ka la ktah shikatdei eh ia u paidbah. U tei u doctor un peit ia ki post-mortem, ne ia ki medical check-up ba la wanrah da ki pulit, ne ia In-Patient, ne ia ki out-patient, ne ia ki emergency case ba hapoh ne shabar jong katei ka jaka ai jingsumar bad kiwei kiwei de ki kam kiba iadei ha katei ka jaka ai jingsumar”. Ka long kaba eh shisha ia uwei u doctor bapli ban shakri kat iaka CHC Khliehriat kaba bunkam bha.
“Ka koit ka khiah ka dei ka bynta ba kongsan tam ha ka jingim jong u briew. Ka dei ka spah bah ia u briew. Wat la u briew u duk haduh kattno katno ruh hynrei lada u long u ba koit ba khiah krat, u dei pat u ba riewspah tam ha ka jingim jong u. Ka jingiehnoh bein jong ka sorkar jylla ia ka tei ka jaka ai jingsumar ba lah dei ban upgrade noh sha ka Civil Hospital hapoh jong ka district ka dei ka jingiehbein ia ka district hi baroh kawei. Kam myntoi ban wanrah ia ki development ba pher ba pher hapoh jong ka district lada ka sorkar pat ka klet ia ka koit ka khiah jong u paidbah,” ong shuh shuh u Bah M.H Dkhar.
“Ka ba pyndiaw shuh shuh ia u paidbah jong ka district, ka dei ka jingbym shym la lah shuh ka sorkar jylla ban plie noh ia ka katei ka hospital ba 100 jingthiah ba la dep tei naduh mynno hynrei ia kaba la shuh attach langtang bad ka Khliehriat CHC. Ka jingbym shym la lah jong ka sorkar jylla ban plie iakatei ka hospital ka dei ka jingduh kaba khraw ia u paidbah jong ka district u ba im mynta ha ka duk ka kyrduh naduh ba khang tih dewiong da ka NGT” la bynrap shuh shuh u Bah DKhar.
Kat ka district EJHD kaba heh, haduh mynta kam pat don DM & HO satia, ka jingbym don ia u DM & HO ba pura ha ka district ka dei ka wei na ki daw jong ka jingdkhoh trei kam ka koit ka khiah ha ka district.
Ka AJYWO ka dawa jur na ka sorkar ba ka dei ban plie noh wut ia ka 100 Bedded Hospital ha Khliehriat, bad ruh ban wanrah ia baroh ki post naduh ki doctor haduh ki staffs ia kiba la sanctioned na ka bynta ka district baroh kawei hynrei kiba trei pat sha kiwei pat ki district. Ka seng ka dawa jur ruh na ka sorkar jylla ban pynbiang doctor shwa ia mynta kham bun ngut ha ka tei ka jaka ai jingsumar wat la kam pat lah ban plie ia katei ka hospital khnang ba u paidbah ba pli un ioh jingiarap.
Ka AJYWO ka la ong ruh ba kan ym shong kli kti hynrei kan iai buddien ban pynbor ia ka sorkar ba ka dei ban plie kloi bad pyntrei kam pura noh ia katei ka hospital 100 Bedded ha Khliehriat.
