Shillong, Naitung 05: Kum shibynta ban pynjanai ia ka rukom shakri paidbah u Bah Banteidor Lyngdoh, MDC Mawkynrew Constituency u la leit ban jngoh ia ka jaka ri khyllung (Crèche Centre) kaba don ha ka shnong Khapmaw, ia kaba la pyniaid da ka Seng Rangbah Khlieh Shnong, Khapmaw kaba hap hapoh jong ka Mawkynrew Constituency khnang ba kum u Nongmihkhmat un sakhi hi dalade ia ka jingtrei borbah jong katei ka kynhun ban kit ia ka lyngkor kaba khia na ka bynta ban ai ka jing shakri kaba janai tam na ka bynta jong ki paidbah Nong Shnong Shnong.
Na ka liang jong u Bah Krill Suting bad u Bah Plaris Nongkynrih Secretary, lem bad lain gut ki nongiarap kiba dei ruh ki nongialam ba hakhmat eh jong ka Seng Rangbah Khlieh Shnong, Khapmaw, kila pynpaw ba kam dei satia ka kam kaba suk ban pyniaid ia ka jaka ri khyllung (Crèche Centre), namar kum ka kynhun ki hap ban mad bad iakynduh ia kiba bun ki jingeh, hynrei kum ka Seng kim shym la kynran dien satia ban bteng ia ka jing shakri namar kid a thrang bad angnud shisha ban ai ia ka jing shakri kaba bha bad kaba janai tam wat la ki hap ban iaid lyngba shibun ki raieh raidam. ki nongialam jong ka Seng Rangbah Khlieh Shnong, Khapmaw ki la pynpaw ruh hakhmat jong u Bah Banteidor Lyngdoh, MDC Mawkynrew Constituency ba naduh ba la seng ia katei ka jaka ri khyllung (Crèche Centre) ha ki khyndiat por kiba la leit noh wat la kadei ka kynhun kaba la dep ban registered bad ka Sorkar hapoh jong ka RGNCS, New Delhi, ia kaba la iarap bei pisa ruh lyngba jong ka CSWB, Social Welfare Department phewse ha kiba bun ki khep ka jingeh kaba kham khraw bad kaba kham khia shi katdei eh kalong haba ki khyllung kiba ju wan buh ha katei ka Crèche Centre ki don hapdeng ka met kaba ym shait ym khlain satia.
Na ka liang jong u Bah Banteidor Lyngdoh, MDC Mawkynrew Constituency u la ong ba kum u Nongmihkhmat paidbah ha i bor iba rit un ialeh ban pyrshang katlah katiai ban pynurlong ia katei ka mynsiem shakri babha jong ka Seng Rangbah Khlieh Shnong, Khapmaw ban thaw ki lad ki lynti lyngba ki jingiarap na ki bor sorkar bad ban kyrpad ruh ia ki bor kiba dei khmih khamtam na ka tnat Social Welfare bad kiwei kiwei de ki tnat sorkar ban peit bad iarap lem ia kitei ki jingeh khnang ban pynsuk ia ki paidbah jong ka Thain kiba wan na ki longing kiba kham duna ha ka ioh ka kot ba lyngba ka jing shakri jong katei ka Crèche Centre bad kiwei dei ki jaka ri khyllung kiba don ha ka thain Mawkynrew hi baroh kawei kan long shisha ka jing kyrkhu na ka bynta jong ki briew kiba donkam ia ka jing shakri.
