Shillong, Rymphang 1: U myntri rangbah jong ka jylla u Dr Mukul Sangma mynta ka sngi u la plie ia ka Bhoirymbong C & RD Block Headquarter ha Khapmara bad ha kane ka juh ka sngi u la buh ruh ia u mawnongrim jong kane ka block kaba saw hapoh jong ka Ri Bhoi District, ia ka jingialang la pynlong hapoh ka shnong Lumdaithkhla.
Ha ka jingkren jong u myntri rangbah ha kane ka sngi u la ong ba kane ka jingplie ia kane ka block ka long kaba don kam na ka bynta ki paidbah jong ka Ri Bhoi District namar ba ia ki skhim kiba dei bad ki paidbah la pyntreikam lyngba jong ki block.
Ha ka jingkren u la ong ba namar ka jingeh than jong ki block bun sien ka wanrah ia ka jingiapher ha ka roi ka par bad ia kane ka jingbakla la don kam ban pynbeit bad ia kane la leh da kaba shna ia ki block thymmai bad kane ka jingdon ia kine ki block thymmai kan iarap ha kaba pynsted ban kyntiew ia ka roi ka par jong ki shnong ki thaw.
U myntri rangbah u la kyntu ia ki paidbah ba kin shim ia ka kabu ia ki skhim jong ka sorkar kiba don, u la ong ka ka SWGH District, NGH District, ka WGH District bad ka Ri Bhoi District ha ka jylla ki long ki jaka kiba biang bha ban rep ban riang, ula kyntu ia ki nongrep ba kin shim ia kane ka lad ban kiew ha ka rep ka riang ka jong ki.
La ong ruh ba ka sorkar kala pyntrei kam ia ka MGNREGS bad ka sorkar kala kut jingmut ban peit ba ka jingmyntoi na kane ka skhim ka dei ban leit sha ki paidbah da kaba don ia ki ain kiba biang kum ka jingtrei shispah sngi la ong u myntri rangbah.
Lah ban pynkynmaw hangne ba ka Bhoirymbong C&RD Block ka dei kaba 42 ha ka jylla, ka Sohiong, Bajengdoba bad ia ka Mawlai C&RD block yn sa plie ha kine ki sngi ban sa wan. Kiwei kiba la kren ha kane ka jingialang ki long u Bah Sngewbhalang Dhar myntri ba dei peit ia ki kam pynroi nongkyndong, u MLA jong kane ka jaka u Bah Ngaitlang Dhar, u Dr C Lyngdoh, kiba la ia don lang ki long u Bah A Lyngdoh MDC jong kane ka jaka, u bah M Nongrem MDC jong ka Langrim bad kiwei kiwei ki heh jong ka sorkar bad ki nongkit kam shnong.
