Shillong, Iaiong 10: Ka shad suk mynsiem kaba 106 jong ka seng khasi seng kmie mynta u snem 2017 kaba la neh lai sngi lynter kala kut mynta ka sngi ha kaba baroh ki nongshad kiba la wan ban ia shim bynta na kylleng ka bri u hynniewtrep kala kot sha ka 1028 ngut.
U Bah Aporlet Shabong Publicity Secretary jong ka seng u la pyntip ba ha ka sngi pynkut mynta ka sngi ki nongshad baroh kila poi sha ka 1028 ngut, ki kynthei kila ia poi 481 ngut bad ki shynrang kiba la ia poi ki long 547 ngut. Ia ka shad suk mynsiem la sdang ha ka 8 tarik kum ka sngi noh kjat bad la pynkut mynta ka sngi.
Kane ka shad suk mynsiem kaba la kynjoh mynta sha ka 106 snem kala nangheh nangheh katba dang mih ki sngi bad ki snem, bad kane ka shad ka pyni sha ka pyrthei ba kum ka jaid byriew khasi ka don la ka jong ka tynrai bad kane ka shad suk mynsiem ka dei ka tynrai jong u khasi kaba la ioh pateng na u ‘ni u kong naduh kip or ba rim ba jah.
Ia kane ka shad seng khasi ha madan weiking la pynlong da ka seng khasi seng kmie na Mawkhar, ha kaba ki para kur para khan a kylleng jong kane ka lum khasi kila ia poi ban ia shim bynta ha kane ka shad ka kmen kaba juh pynlong man u snem ha kane ka madan Weiking. Ia ka shad ka kmen la sdang ka jingduwai phirat ha iing seng ha Mawkhar bad sa iaid paidbah sha madan weiking bad ha dien ba la duwai ha kane ka jaka la sdang sa ka shad ka kmen.
