Shillong, Rymphang 23: U myntri ba dei peit ia ka tnad sam umbam umdih jong ka sorkar jylla u Bah Prestone Tynsong u la pynbna paidbah ba ka Mawkynrew C&RD Block kala dei ka block kaba nyngkong hapoh jong ka East Khasi Hills District kaba la don lut ki jaka leit bar sha baroh ki shnong ia kane ka jingialang paidbah la pynlong ha phyllaw jong kane ka Block.
Haba kren ha kane ka jingialang paidbah na ka liang jong u bah Prestone u la ong ba kane ka jingjop baroh ka dei na ka jingtrei shimtom jong u BDO bad ka jingiatreilang ki bor shnong ha kaba la lah ban pynlong ia baroh ki shnong hapoh jong kane ka block ba baroh ki long iing kin don ia ki jaka leit bar.
U Bah Prestone u la ong ban wanrah ia ki kam pynroi sha ki shnong ki thaw don kam ia ka jingiatreilang ryngkat ryngkat ha pdeng ka sorkar bad ki paidbah ha baroh ki liang na ka bynta ban kyntiew ia ka roi ka par jong ka dong bad ka thain hi baroh kawei. Ia kane ka jingialang paidbah la pynbeit da ka District Water and Sanitation Mission (DWSM), East Khasi Hills District.
Ha kane ka sngi na ka liang jong u myntri u la pynkup burom ia u BDO jong ka Mawkynrew C&RD Blcok Bah W B Marbaniang bad ia baroh 67 ngut ki sordar kiba hap hapoh jong kane ka Block kiba la ioh ruh ia ka jingiaroh na ka Swachh Bharat Mission. Ha kane ka sngi kiba la ia don lang ki long u Bah R Pyngrope MLA, Bah Banteidor Lyngdoh MDC Bah PS Dkhar DC jong ka East KHasi Hills District bad kiwei kiwei ki heh sorkar.
